स्वातंत्र्याच्या अमृत महोत्सवानिमित्त
हडपसर : ‘स्वातंत्र्याचा अमृतमहोत्सवानिमित्ताने केंद्र शासन पुरस्कृत योजनेतून पुणे वनपरिक्षेत्र कार्यालयांतर्गत महंमदवाडी तसेच हडपसर येथे ‘नगर वन उद्यान’ उभारणीचा शुभारंभ झाला. पुणे वनवृत्ताचे मुख्य वनसंरक्षक एन. आर. प्रवीण यांच्या अध्यक्षतेखाली व पुणे वन विभागाचे उपवनसंरक्षक राहुल पाटील यांच्या उपस्थितीत हा शुभारंभ झाला.
वन परिक्षेत्र पुणे अंतर्गत महंमदवाडी व हडपसर येथील उद्यानात ‘हरियाली महोत्सव’ अंतर्गत सुमारे ८५० वृक्षांची लागवड करण्यात आली. बिशप स्कूल उंड्री आणि सुमतीबाई शाह आयुर्वेद महाविद्यालय हडपसर येथील विद्यार्थी, तसेच आनंदवन फाउंडेशन, ग्रीन नंदनवन या स्वयंसेवी संस्थेच्या सदस्यांनी या वृक्षारोपणात सहभाग घेतला. यावेळी उपस्थितांना वृक्ष संवर्धनासंदर्भात तसेच पुणे वन विभाग राबवत असलेले ‘क्लीन हिल्स, ग्रीन हिल्स’, वनमहोत्सव, हरियाली महोत्सव आदी उपक्रमांविषयी माहिती देऊन सहभागाविषयी आवाहन करण्यात आले.
नागरिकांमध्ये वृक्षलागवड करून जंगल वाचविण्याबाबत जनजागृती निर्माण करण्यासाठी हा उपक्रम अत्यंत स्तुत्य आहे. या उपक्रमाच्या माध्यमातून टेकड्यांवर वृक्षलागवडीला प्रोत्साहन मिळणार आहे. दिवसेंदिवस कार्बन डायऑक्साईडची भर पडत आहे. कार्बन उत्सर्जन रोखण्यासाठी वन विभागाच्या वतीने शहरात साधारणपणे जास्तीत जास्त वृक्षलागवड करण्याचे पुणे वनविभागाचे उद्दिष्ट आहे.