मुंबई | Irrfan Khan – बाॅलिवूडचा प्रसिद्ध अभिनेता इरफान खानच्या (Irrfan Khan) निधनातून त्याचे चाहते अजूनही सावरलेले नाहीयेत. त्याच्या निधनानं संपूर्ण सिनेसृष्टीला मोठा धक्का बसला होता. इरफान खानला जाऊन येत्या 29 एप्रिलला 3 वर्ष पूर्ण होतील. तसंच इरफाननं त्याच्या उत्कृष्ट अभिनयानं प्रेक्षकांच्या मनात स्थान निर्माण केलं होतं. त्यामुळे त्याचा प्रत्येक चित्रपट पाहण्यासाठी त्याचे चाहते नेहमीच आतुर असायचे. तर आता इरफानच्या चाहत्यांसाठी मोठी खुशखबर आहे. लवकरच इरफानचा शेवटचा चित्रपट प्रेक्षकांच्या भेटीस येणार आहे.
इरफान खानचा ‘द साॅन्ग ऑफ स्काॅर्पियन्स’ (The Song Of Scorpions) हा शेवटचा चित्रपट लवकरच प्रदर्शित होणार आहे. नुकताच या चित्रपटाचा ट्रेलर समोर आला आहे. तसंच इरफानचा मुलगा आणि अभिनेता बाबील खाननं (Babil Khan) सोशल मीडियावर वडीलांच्या शेवटच्या चित्रपटाचं पोस्टर शेअर करत या चित्रपटाबाबत माहिती दिली आहे.
दरम्यान, इरफानच्या या चित्रपटाचा ट्रेलर प्रदर्शित झाला असून हा ट्रेलर सोशल मीडियावर चांगलाच धुमाकूळ घालत आहे. या ट्रेलरला प्रेक्षकांनी मोठ्या प्रमाणात पसंती दर्शवली आहे. तसंच इरफानचा हा चित्रपट 28 एप्रिल रोजी चित्रपटगृहात प्रदर्शित होणार आहे. त्यामुळे आता इरफानचे चाहते त्याचा हा नवीन चित्रपट पाहण्यासाठी उत्सुक झाले आहेत.