मुंबई : मराठी अभिनेत्री मुक्ता बर्वे ही लोकप्रिय अभिनेत्रींपैकी एक आहे. आत्तापर्यंत मुक्ता बर्वेनं अनेक चित्रपट, मालिकांमध्ये काम करत प्रेक्षकांची मनं जिंकली आहेत. त्यानंतर आता मुक्ता आपल्या आवाजाच्या जादूनेही प्रेक्षकांचे मनोरंजन करण्यास सज्ज झाली आहे. स्टोरीटेल या मराठी अॅपवर ‘Virus-पुणे’ नावाच्या सीरीजचा दुसरा भाग लवकरच प्रेक्षकांच्या भेटीला येणाार आहे. नुकतंच तिने सोशल मीडियावर पोस्ट शेअर करत याबाबतची माहिती दिली आहे.
मुक्ता ही सोशल मीडियावर चांगलीच सक्रीय असते. तसंच नुकतंच मुक्ताने इन्स्टाग्रामवर यासंदर्भातल्या काही पोस्ट शेअर केल्या आहेत. मुक्ताने इन्स्टाग्राम एक व्हिडीओ शेअर केला आहे. या व्हिडीओला कॅप्शन देताना ती म्हणाली, “एका जीवघेण्या व्हायरसच्या निमित्तानं पुण्यावर एक भयंकर संकट कोसळलंय. सगळं शहर पत्त्यांसारखं उन्मळून पडत असताना नेहाच्या मुलीला मायराला काही अज्ञात लोकांनी किडनॅप केलंय.” मुक्ताची ही पोस्ट सध्या सोशल मीडियावर चांगलीच चर्चेत आहे.
“मायरापर्यंत पोचण्यात, तिचा शोध घेण्यात नेहा, दिव्या, सचिन यशस्वी होतील? न भूतो न भविष्यती अशा या संकटातून ते खरंच बाहेर पडतील? नियतीचा हा जीवघेणा खेळ खरंच संपेल? व्हायरस पुणे season 2. उद्या येतंय”, असंही मुक्ता बर्वे म्हणाली.
सोबतच मुक्ताने स्टोरीटेलची एक पोस्ट देखील शेअर केली आहे. यात तिने म्हटलं आहे की, “व्हायरस परत आलाय!!! नेहाच्या मुलीला मायराला आर्मीच्या काही अज्ञात लोकांनी किडनॅप केलं असून, तिला काहीही करून आपल्या लेकीपर्यंत पोचायचंय. पण संकटांची मालिका काही थांबायला तयार नाहीये. आता तर शहरातली भटकी कुत्रीही पिसाळलीयंत. अशात दिव्याला मायरापर्यंत पोचायची एक आयडिया सुचते. ते खरंच पोचू शकतील मायरापर्यंत? ऐका व्हायरस पुणे ह्या जबरदस्त थ्रिलर सिरीजचा दुसरा सिझन. व्हायरस पुणे – सिझन 2, मुक्ता बर्वेच्या आवाजात.”