मुंबई : खासदार नवनीत राणा यांच्या लीलावती रुग्णालयात एमआरआयसह विविध तपासण्या होत असतानाचा तिथला व्हिडीओ समोर आल्यानंतर शिवसेनेनं रुग्णालय प्रशासनास चांगलचं धारेवर धरलं आहे. नवनीत राणा यांचा सीटी स्कॅन करतानाचा फोटो आणि व्हिडीओ व्हायरल झाल्यामुळे तिथे फोटो कसा काढण्यात आला, याविषयी रुग्णालयानं स्पष्टीकरण देण्याची मागणी करत राणांवर झालेल्या उपचारांविषयी शंका उपस्थित करण्यात आली आहे. नवनीत राणांच्या उपचारांबाबत जाब विचारण्यासाठी मुंबईच्या महापौर किशोरी पेडणेकर, शिवसेनेच्या आमदार मनीषा कायंदे शिवसेनेचे पदाधिकारी व कार्यकर्ते लीलावती रुग्णालयात दाखल झाले आहेत, तसंच नवनीत राणांचा रिपोर्ट मिळाल्याशिवाय इथून हलणार नाही, असा आक्रमक पवित्रा शिवसेनेकडून घेण्यात आला आहे.
नवनीत राणा यांचा खरच एमआरआय झाला आहे का?, एमआरआय करताना व्हीडीओ शुटींग आणि फोटो कसे काढले गेले? रुग्णलायाचे नियम सर्वांना समान हवेत. त्यांचा तपासण्यांचा रिपोर्ट मिळेपर्यंत आम्ही जाणार नाहीत. असं म्हणत शिवसेनेकडून रुग्णालय प्रशासनाला धारेवर धरण्यात आलं आहे.
रुग्णालयात फोटोग्राफी आणि शुटींग करण्यासाठी कोणी दबाव आणला आहे का? याचा तपास झाला पाहिजे. याप्रकरणी आम्ही पोलिसांकडे तक्रार करणार आहोत, अशी माहिती शिवसेना नेत्या मनिषा कायंदे यांनी माध्यमांना दिली आहे.