राष्ट्रपती पुरस्काराने सन्मानित शिस्तप्रिय व संवेदनशील प्राचार्य
पुणे : शेकडो लोकांनी कौतुक केल म्हणून काही कुणी यशस्वी ठरत नाही .प्रतिकूल परिस्थितीतही जे शांतपणे यशाला गवसणी घालतात. त्यांनाच यशस्वी म्हंटले जात. दृष्टीकोन हा मनाचा आरसा आहे, तो नेहमी विचारच परावर्तीत करतो. कायम सकारात्मक दृष्टीकोन असावा या उद्देशाने प्रेरित होवून राष्टपती पुरस्कार प्राप्त करणा शिस्तप्रिय व संवेदनशील प्राचार्य म्हणून प्राचार्य नंदकुमार सागर यांची पुणे जिल्ह्यात ओळख आहे.
सह्याद्रीच्या कुशीत असणार्‍या विंझर हे प्राचार्य नंदकुमार सागर यांचे जन्मगाव. प्रतिकूल परीस्थित एम.ए.जी.डी आर्ट्सची पदवी घेवून श्री शिवाजी शिक्षण प्रसारक मंडळ सासवड या संस्थेच्या जेजुरी येथील जिजामाता विद्यालयात १९९३ साली रुजू झाले. सकारात्मक विचारधारा, उपक्रमशीलता, कष्ट, प्रमाणिक पणा व विद्यार्थी प्रिय शिक्षक या गुणाच्या जोरावर त्यांची मुख्याध्यापक पदी पदोन्नती झाली.एक कला शिक्षक आणि मुख्याध्यापक पद हे अतिशय दुर्मिळ उदाहरण आहे.
सुरवातीच्या काळात कमी पगार,अपुर्‍यासुविधा,विद्यालयाच्या परिसरातील मंदिरात झोपून ,लोकांच्या दुकानाचे बोर्ड रंगवून, पेंटीग कामे करून,अर्धपोटी राहून पगारासाठी काम न करता विद्यालयाती विद्यार्थी आदर्श घडला पाहिजे या ध्येयाने सागर सरांनी काम केले. केवळ १७ विद्यार्थ्यांवर सुरु झालेल्या या विद्यालयासाठी नंदकुमार सागर सर यांनी शिक्षणाचे महत्व पटवून देत , शैक्षणिक ,कला,क्रीडा क्षेत्रात उपक्रमशीलत वाढवून गुणवत्तेचा आलेख उंचावला. क्रीडा क्षेत्रात राष्ट्रीय पातळीवर ७ तर राज्य पातळीवर १६७ खेळाडू या विद्यालयातून निर्माण झाले आहेत.
महाराष्ट्र शासनाचा हरित सेना विभागाचा पंचतारांकित शाळा पुरस्कार हि शाळेने मिळविला आहे. डिजिटल शाळा. दहावीच्या विद्यार्थ्यांना मोफत tab,अद्यावत प्रयोगशाळा,संगणक कक्ष,सुसज्ज वाचनालय,जिम सर्व प्रकारच्या सुविधा विद्यालया मध्ये सागरसर यांनी निर्माण केल्या आहेत. आज प्राचार्य नंदकुमार सागर सर हे पुणे जिल्हा माध्यमिक व उच्चमाध्यमिक मुख्याध्यापक संघाची अध्यक्ष पदाची धुरा सांभाळीत आहेत. शैक्षणिक क्षेत्रात त्यांनी केलेल्या महायज्ञाची दखल घेत भारत सरकारने सन २०१६ चा शिक्षणक्षेत्रातील सर्वोच्च राष्ट्रपती पुरस्कार देऊन त्यांच्या कार्याचा गुणगौरव केला आहे. या पुरस्कारा नंतरहि कोणताही गर्व न बाळगता त्याच निष्ठेने आपल्या ध्येयाशी स्थितप्रज्ञ राहून कार्यरत आहेत. एक हृदयस्पर्शी व कर्तव्यशील व्यक्तिमत्वास सलाम.
