“आपल्या पोटात एक आणि ओठात एक असं आम्ही कधी केलं नाही”
मुंबई | CM Eknath Shinde On Uddhav Thackeray – मुख्यमंत्री एकनाथ शिंदे यांनी आज (26 ऑगस्ट) आनंद दिघे यांच्या पुण्यतिथीनिमित्त त्यांना अभिवादन केलं. यावेळी बोलताना त्यांनी उद्धव ठाकरेंवर निशाणा साधला. आम्ही आनंद दिघे यांच्या विचारांनी चाललो असल्याचं एकनाथ शिंदे म्हणाले. तसंच आम्ही शेतकऱ्यांसाठी काम करणार असल्याचं देखील त्यांनी म्हटलं आहे.
यावेळी एकनाथ शिंदे म्हणाले, “आपल्या पोटात एक आणि ओठात एक असं आम्ही कधी केलं नाही. बाळासाहेबांचा आणि दिघेसाहेबांचा आशिर्वाद आमच्या पाठीमागे आहेच. जनतेसाठी चांगलं काम करणे हीच खरी दिघेसाहेबांसाठी श्रद्धांजली असेल.”
पुढे बोलताना एकनाथ शिंदेंनी आनंद दिघे यांच्याबद्दलचे किस्से सांगितले. “त्यांनी मला जेव्हा ठाणे महापालिकेचा सभागृह नेता केलं तेव्हा ते बाहेरून विचारपूस करत मी काम कसं करतो आहे त्याबद्दल विचारायचे. एकनाथ कसं काम करतोय असं ते विचारायचे. आपला शिष्य कशा प्रकारे जबाबदारी पार पाडतोय याची ते माहिती घ्यायचे.” असं ते म्हणाले. आजही त्यांच्याच विचारांचा वारसा घेऊन आम्ही राज्याच्या विकासाचं काम पार पाडणार आहोत असंही ते म्हणाले.
