वाद पुन्हा पेटला! बच्चू कडूंचा रवी राणांना कडक इशार; म्हणाले, “घोडा मैदान समोर आहे, कोण…”,

मुंबई : (Bacchu Kadu On Ravi Rana) गेल्या दोन दिवसांपासून प्रहार संघटनेचे अध्यक्ष, आमदार बच्चू कडू आणि अपक्ष आमदार रवी राणा यांच्यात आरोप-प्रत्यारोपाच्या फैरी सुरू आहेत. सरकारला ब्लॅकमेल करून काहीतरी मिळवण्याचा प्रयत्न करणाऱ्यांना आवर घालण्याची गरज आहे, अशी टीका रवी राणांनी केली होती. याला बच्चू कडू यांनी मोजक्या शब्दांत उत्तर दिलं आहे.

“उपमुख्यमंत्री देवेंद्र फडणवीस यांचं अभय असल्यामुळे राणा दाम्पत्य काहीही वक्तव्य करतात. राणांना फडणवीसांनी आवर घातली पाहिजे,” असं विधान बच्चू कडू यांनी केलं होतं. याला उत्तर देताना रवी राणा म्हणाले, “मी देवेंद्र फडणवीसांबरोबर ११-१२ वर्षापासून आहे. सुख आणि दु:खात एकत्र राहणारे व्यक्ती आम्ही आहोत. पळ काढणारे नाहीत. बच्चू कडू कधी इकडे कधी तिकडे असतात. त्यांनी सल्ला देण्याचं काम करू नये.”

“बच्चू कडूंना आवर घालण्याची गरज”
“मला पाडण्यासाठी सर्व नेते निवडणुकीत एकत्र येतात. पण, जनता नेहमी माझ्याबरोबर असते. बच्चू कडूंना आवर घालण्याची गरज आहे. सरकारला ब्लॅकमेल करून काहीतरी मिळवण्याचा प्रयत्न करणाऱ्यांना आवर घालण्याची गरज आहे. आम्ही कधी मंत्रीपद, तिकीट किंवा कोणतं पद मागितलं नाही,” असं रवी राणांनी म्हटलं होतं.

“घोडा मैदान समोर आहे”
यावर आता बच्चू कडू यांनी राणांना सूचक इशारा दिला आहे. “घोडा मैदान समोर आहे. कोण काय करतं ते पाहूयात,” असं बच्चू कडू म्हणाले आहेत.