एमपीएससीचे विद्यार्थी रस्त्यावर! काय आहेत मागण्या? जाणून घ्या

पुणे | Pune MPSC Protest – आज (19 डिसेंबर) पुण्यातील (Pune) एमपीएससीचे (MPSC) विद्यार्थी रस्त्यावर उतरले आहेत. 2025 पासून राज्यसेवा मुख्य परीक्षेसाठी नवीन पॅटर्न लागू करा, अशी मागणी विद्यार्थ्यांनी केली आहे. पुण्यातील नवी पेठेतील अहिल्या शिक्षण संस्थेसमोर एमपीएससीचे शेकडो विद्यार्थी विविध मागण्यांसाठी रत्यावर उतरले आहेत. तसंच कोणताही अनुचित प्रकार घडू नये, यासाठी पोलिसांचा मोठा बंदोबस्त तैनात करण्यात आला आहे. यावेळी विद्यार्थ्यांकडून मोठ्या प्रमाणात घोषणाबाजी देखील करण्यात आली.

पुण्यात एमपीएससीचा अभ्यास करणारे विद्यार्थी मोठ्या प्रमाणात आहेत. अनेक वर्ष विद्यार्थी राज्यसेवा परीक्षेचा अभ्यास करत असतात. मात्र, 2023 मध्ये अभ्यासक्रमात बदल करण्यात आला आहे. त्यामुळे विद्यार्थी आक्रमक झाले आहेत. विद्यार्थ्यांना अभ्यासक्रमातील बदल मान्य नाहीत. त्यामुळे नव्या अभ्यासक्रमाबाबतचे नियम किंवा 2025 मध्ये नवा पॅटर्न लागू करावा, अशी मागणी विद्यार्थांनी राज्य सरकारकडे केली आहे.

मागील काही वर्षांपासून विद्यार्थी राज्यसेवा परीक्षेचा अभ्यास करत आहेत. अशातच आता नवा पॅटर्न लागू होणार असल्यानं विद्यार्थी आक्रमक झाले आहेत. या नव्या पॅटर्नबाबत जर सरकारनं निर्णय घेतला नाही तर पुन्हा मोठं आंदोलन करु, असा इशारा विद्यार्थांनी राज्य सरकारला दिला आहे. नवीन पॅटर्न 2025 मध्ये लागू केला तर, जुन्या पद्धतीने अभ्यास करणाऱ्या विद्यार्थ्यांना शेवटच्या दोन संधी मिळतील. पॅटर्न लागू करण्याची घाई झाली तर विद्यार्थ्यांचं नुकसान होईल. याबाबत सरकारनं विचार करावा, अशी मागणीही त्यांनी केली आहे.