अभिमानास्पद! सरगम कौशलने जिंकला ‘मिसेस वर्ल्ड’चा किताब, तब्बल 21 वर्षांनंतर भारताकडे आला मुकूट
लास वेगास | Mrs. World 2022 – आज (19 डिसेंबर) भारतासाठी अत्यंत अभिमानाचा असा क्षण आहे. कारण तब्बल 21 वर्षांनंतर भारताला ‘मिससे वर्ल्ड’चा किताब मिळाला आहे. जम्मू काश्मीरची सरगम कौशल (Sargam Kaushal) ‘मिसेस वर्ल्ड 2022’ (Mrs. World 2022) ची विजेती ठरली आहे. अमेरिकेत या सौंदर्यस्पर्धेचं आयोजन करण्यात आलं होतं. हा किताब मिळाल्यानंतरचे सरगमचे काही फोटो आणि व्हिडीओ सोशल मीडियावर व्हायरल होत आहेत. भारताला 21 वर्षांनी हा किताब मिळवून दिल्याबद्दल सरगमवर देशभरातून कौतुकाचा वर्षाव होत आहे.
मिसेस वर्ल्ड 2022 चं मुकूट परिधान केल्यावर सरगमवर सेलिब्रिटींकडून शुभेच्छांचा वर्षाव होत आहे. यामध्ये अदिती गोवित्रीकर, सोहा अली खान, विवेक ओबेरॉय आणि मोहम्मद अजहरुद्दीन यांनी सरगमचं कौतुक केलं आहे. ‘या प्रवासाचा एक भाग बनल्याबद्दल मी खूप आनंदी आहे. भारतात 21 वर्षांनंतर हा किताब परतला. तुला मनापासून शुभेच्छा’, असं अदिती गोवित्रीकरनं लिहिलंय. अदिती गोवित्रीकरनं 2001 मध्ये मिसेस वर्ल्डचा किताब जिंकत भारताची मान उंचावली होती.
कोण आहे सरगम कौशल?
मिसेस वर्ल्डचा किताब जिंकणारी सरगम कौशल ही मूळची जम्मू-काश्मीरची आहे. ती एक शिक्षिका आणि मॉडेल आहे. सरगमचं 2018 मध्ये लग्न झालं. त्यानंतर तिला सौंदर्यस्पर्धेत भाग घेण्याची फार इच्छा होती. तसंच सरगमने याआधी मिसेस इंडिया 2022 चा किताबही पटकावला होता.
