मार्च महिन्यात 1.60 लाख कोटीहून अधिक जीएसटी संकलन; महाराष्ट्रातून सर्वाधिक कर
नवी दिल्ली : (GST Collection March 2023) देशात वस्तू आणि सेवा कर म्हणजेच जीएसटी कलेक्शनने (GST Collection) सरकारच्या तिजोरीत चांगलीच भर पडली आहे. मार्च 2023 मध्ये जीएसटी संकलन (March 2023 GST Collection) चांगले झाले आहे. मार्च 2023 मध्ये देशाचे जीएसटी संकलन 1 लाख 60 हजार 122 कोटी रुपये इतके झाले. जीएसटीच्या आजपर्यंतच्या इतिहासातील हे दुसरे सर्वात मोठे संकलन आहे.
आर्थिक वर्ष 2022-23 मध्ये एकूण 18.10 लाख कोटी रुपये जीएसटी कर जमा करण्यात आला. दर महिन्याला सरासरी 1.51 लाख कोटींचा महसूल जमा करण्यात आला. आर्थिक वर्ष 2022-23 मध्ये मागील वर्ष 2021-22 च्या तुलनेत 22 टक्के अधिक जीएसटी जमा झाला. मात्र, मार्च 2023 मध्ये एकत्रित GST महसूल हा तब्बल एक लाख 60 हजार 122 कोटी आहे.
मार्च 2023 मध्येही सर्वाधिक जीएसटी संकलन महाराष्ट्रातून करण्यात आले. महाराष्ट्रातून 22 हजार 695 कोटी जीएसटी जमा करण्यात आला. तर, दुसऱ्या क्रमांकावर गुजरात राज्य आहे. गुजरातमधून 9919 कोटींचा जीएसटी वसूल करण्यात आला. तर, तिसऱ्या स्थानावरील तामिळनाडूमधून 9245 कोटींचा जीएसटी जमा झाला. हरयाणामधून 7780 कोटींचा जीएसटी जमा झाला.
