रामनवमी दिवशी लोकांच्या भावना दुखावतील म्हणून नास्तिक मेळावा रद्द

पुणे : रविवारी पुण्यात होणारा नास्तिक मेळावा रद्द करण्यात आली आहे कारण “रामनवमी उत्सवाच्या दिवशी असा कार्यक्रम आयोजित केल्यास कायदा आणि सुव्यवस्थेचा प्रश्न निर्माण होऊ शकतो”, अशी भीती शहर पोलिसांना वाटत होती, असे त्याच्या आयोजकांनी सांगितले.

भगतसिंग विचारमंचच्या वतीनं गेली सहा वर्ष राज्यभरात नास्तिक मेळावे घेण्यात येतात. मात्र पोलिसांच्या दबावामुळे आज होणारा नास्तिक मेळावा रद्द करावा लागला आहे. कोरोना काळानंतर होणारा हा पहिलाच नास्तिक मेळावा होता. मात्र, रामनवमीच्या दिवशी नास्तिक मेळावा घेतल्याने काही लोकांच्या भावना दुखावतील असं कारण पोलिसांनी पुढे केलं आहे. नास्तिक मेळाव्याच्या आयोजकांवर यापार्श्वभूमीवर दबाव टाकत हा मेळावा रद्द करण्यात भाग पाडले आहे.

“नास्तिक परिषदेची ही सातवी आवृत्ती होती. जबाबदार नागरिक म्हणून आम्ही पोलिसांना याची माहिती दिली. पण नंतर पोलिस आम्हाला बोलवू लागले. शनिवारी सकाळी पोलिस अधिकाऱ्यांसोबत आमची बैठक झाली. पोलिसांनी आम्हाला सांगितले की 10 एप्रिल ही राम नवमी आहे आणि त्याच दिवशी नास्तिक परिषद आयोजित केल्याने कायदा आणि सुव्यवस्थेचा प्रश्न निर्माण होऊ शकतो. पोलिसांनी कोणत्याही संघटनेचे किंवा व्यक्तीचे नाव घेतले नाही, परंतु ते म्हणाले की काही संघटनांनी असा दावा केला आहे की आस्तिकांच्या भावना दुखावण्यासाठी रामनवमीच्या दिवशी नास्तिक परिषदेचे नियोजन केले आहे. पोलिसांनी कायदा आणि सुव्यवस्थेची भीती व्यक्त केली,” असे संयोजक डॉ नितीन हांडे यांनी सांगितले.

यावर्षी शरद बाविस्कर आणि तुकाराम सोनावणे हे या मेळाव्यात वक्ते म्हणून येणारे होते तर कार्यक्रमाच्या अध्यक्षा मुग्धा कर्णिक असणार होत्या. विविध वक्त्यांचे विचार ऐकण्याची संधी पुणेकरांना यानिमित्ताने मिळणार होती, मात्र आता हा मेळावात रद्द झाला आहे. आयोजक मात्र नाराज आहेत.

या कार्यक्रमात ज्येष्ठ विचारवंत य. ना. वालावलकर यांच्या ‘विवेकी विचार’ या पुस्तिकेचे प्रकाशन देखील या मेळाव्यात होतं. पोलिसांनी दबाव टाकून मेळावा रद्द करायला लावल्यावर सोशल मीडियावर मात्र महाविकास आघाडी सरकारवर काही लोकांकडून मोठ्या प्रमाणात टीकाही होत आहे.