वसंत मोरे यांच्या अडचणीत वाढ; राज ठाकरेंनी शहराध्यक्ष पद काढून घेतलं अन् आता पोलिसांची नोटीस
पुणे : मनसे अध्यक्ष राज ठाकरे यांनी गुढी पाडव्याच्या मेळाव्यात मशिदींवरील भोंगे हटवले नाहीत, तर तिथेच समोर लाऊडस्पिकर लावून हनुमान चालिसा वाजवण्याची भुमिका त्यांनी घेतली होती. मात्र, आपण असं करणार नसल्याचं म्हणत मनसेचे माजी पुणे शहराध्यक्ष वसंत मोरे यांनी याविरोधात भूमिका घेतली. या मुद्दयावरुन पक्षानं त्यांची शहराध्यक्षपदावरुन उचलबांगडी केली आहे. तसंच आता त्यांच्या अडचणीत वाढ झाली आहे. आता मोरेंना पोलिसांची नोटीसही आलीये. भोंगा प्रकरणावरुन मोरेंचं पद गेल्याची चर्चा असतानाच याच प्रकरणावरुन केलेल्या एका वक्तव्यामुळे मोरेंना पोलिसांनी नोटीस पाठवली आहे.
भारती विद्यापीठ पोलीस स्थानकाने मोरे यांना नोटीस पाठवली आहे. या नोटीसमध्ये मोरे यांनी दोन समाजांमध्ये तेढ निर्माण करणारं वक्तव्य केल्याचं सांगत सीआरपीसी १४९ अंतर्गत नोटीस पाठवण्यात येत असल्याचं म्हटलं आहे. भारती विद्यापीठ पोलीस स्थानकातील वरिष्ठ पोलीस निरिक्षकांच्या स्वाक्षरीसहीत ही नोटीस पाठवण्यात आली आहे.
वसंत कृष्णाजी मोरे, अध्यक्ष महाराष्ट्र नवनिर्माण सेना पक्ष, पुणे शहर आपणांस या नोटीसद्वारे कळवण्यात येते की दिनांक दोन एप्रिल २०२२ रोजी महाराष्ट्र नवनिर्माण सेनेचे अध्यक्ष राज ठाकरे यांच्या नेतृत्वाखाली मुंबईत गुढीपाडव्याच्या निमित्ताने शिवाजी पार्क येथे कार्यकर्ता मेळावा आयोजित करण्यात आलेला. सरद मेळाव्यामध्ये पक्षाध्यक्ष राज ठाकरेंनी महाराष्ट्रातील मशिदींवरील भोंगे जर काढले नाहीत तर महाराष्ट्र नवनिर्माण सेनेच्या वतीने मशिदीसमोर हनुमान चालीसाचे पठण करण्यात येईल असे वक्तव्य केले आहे.
आपण व आपल्या पक्षांचे पदाधिकारी, कार्यकर्ते यांनी वरील वक्तव्याने अनुषंगाने दोन समाजात धार्मिक किंवा जातीय तेढ निर्माण होऊन कायदा व सुव्यवस्थेचा प्रश्न निर्माण होईल असं कोणतेही कृत्य करु नये अन्यथा आपणावर प्रचलित कायद्यान्वये कारवाई करम्यात येईल याची नोंद घ्यावी. असं या नोटीसमध्ये म्हटलं आहे.
