डुकरांना मारण्यासाठी वापरलेले 12 क्रूड बॉम्ब सापडले; नागरिकांमध्ये घबराट

पुणे: दिघी पोलिसांनी शुक्रवारी वडमुखवाडी येथून डुक्कर आणि भटक्या प्राण्यांना मारण्यासाठी वापरलेले डझनभर क्रूड बॉम्ब जप्त केले आहेत. क्रुड बॉम्ब सापडल्याने चर्‍होली आणि वडमुखवाडी येथील नागरिकांमध्ये घबराट पसरली आहे. पोलिसांनी दिलेल्या माहितीनुसार, बॉम्ब एका महिलेने पाहिला होता, तिच्या पाच वर्षांच्या मुलीचा 5 फेब्रुवारी रोजी अशाच स्फोटकांनी मृत्यू झाला होता, तेव्हा मुलीने चेंडूसारखा दिसल्याने चुकून तो घेतला आणि त्याच्याशी खेळण्याचा प्रयत्न केला होता.

तज्ज्ञांच्या म्हणण्यानुसार, डुकरांना मारण्यासाठी हे क्रूड बॉम्ब शेतात वेगळ्या ठिकाणी ठेवले जातात. भटकी डुकरं क्रूड बॉम्ब खातात ज्यामुळे स्फोट होतो आणि त्यांचा मृत्यू होतो. ते स्फोटक पदार्थांनी बनवलेले आहेत.

बॉम्ब दिसल्यानंतर, महिलेने तिच्या पतीला याची माहिती दिली ज्याने तत्काळ पोलिसांना सूचित केले असल्याचे, अधिकाऱ्यांनी सांगितले. दिघी पोलिस ठाण्याचे प्रभारी दिलीप शिंदे यांनी सांगितले की, 12 क्रूड बॉम्ब सापडले आहेत. “आम्ही स्त्रोत आणि या भागात क्रूड बॉम्ब ठेवलेल्यांचा शोध घेण्याचा प्रयत्न करत आहोत. गंभीर निष्काळजीपणा आणि परिसरातील रहिवाशांचे जीवन धोक्यात आणल्याबद्दल गुन्हा दाखल केला जाईल.

फेब्रुवारीमध्ये राधा गोकुळ गवळी (५) हिचा असा क्रूड बॉम्ब उचलल्यानंतर मृत्यू झाला होता, तर आरती (४) आणि राजू महेश गवळी (४) ही दोन मुले जखमी झाली होती. मुलीच्या मृत्यूनंतर, पोलिसांनी आयपीसी कलम 286, आणि स्फोटक पदार्थ कायद्याच्या संबंधित तरतुदींनुसार गुन्हा दाखल केला आणि मोकळ्या भूखंडावर क्रूड बॉम्ब टाकून देण्यासाठी दोघांना अटक केलेली आहे.