समृद्धी महामार्गाचा ११ जिल्ह्यांना होणार फायदा
प्रकल्पाचे जवळपास ६० टक्के काम पूर्ण
मुंबई : महाराष्ट्रातील ११ जिल्ह्यांना जोडणार्‍या या महामार्गामुळे दळणवळणाची गती वाढणार आहे. समृद्धी महामार्गालगत सीएनजी पाईपलाईन टाकण्याचे काम युद्धपातळीवर सुरू आहे. समृद्धी महामार्गामुळे अकरा जिल्ह्यांना लाभ होणार आहे. सध्या सीएनजी पाइपलाइनचे काम ६० टक्के पूर्ण झाल्याची माहिती गेल अर्थात गॅस अ‍ॅथॉरिटी ऑफ इंडियाच्या अधिकार्‍यांनी दिली आहे. अमरावतीसह समृद्धी महामार्ग ज्या जिल्ह्यांतून किंवा जिल्ह्यांच्या आजूबाजूने गेला आहे, त्या जिल्ह्यात आगामी काळात सीएनजी उपलब्ध होणार आहे.
महाराष्ट्रातील काही जिल्हे वगळता अनेक ठिकाणी सीएनजी अद्याप पोहोचला नाहीय. मात्र आता समृद्धीच्या कडेला असलेल्या पाइपलाइनद्वारे सीएनजी मिळणार आहे. त्यामुळे पेट्रोल आणि डिझेलला सक्षम पर्याय उपलब्ध असेल. महाराष्ट्राचा महत्त्वाकांक्षी समृद्धी महामार्ग नागपूर, वर्धा, यवतमाळ, अमरावती, वाशिम, बुलडाणा, औरंगाबाद, जालना, अहमदनगर, नाशिक व ठाणे या जिल्ह्यांतून गेलेला आहे. यापैकी औरंगाबाद, नागपूर, ठाणे, नाशिक व अहमदनगर वगळता कुठेही सीएनजीची योजना सुरू झालेली नाही.
नागपूरसारख्या ठिकाणी सीएनजी मुंबई, पुण्यातून टँकरद्वारे वाहतूक करून पोहोचवला जातो. त्यामुळे अल्प प्रमाणात आहे, तसेच मुंबई पुण्याच्या तुलनेत दीडपट महाग आहे. गॅस पाइपलाइनद्वारे पुरवलेला सीएनजी पुरेशा प्रमाणात स्वस्त राहणार आहे. कारण पाइपलाइनमुळे वेळ आणि पैसा दोन्हींची बचत होणार आहे.
समृद्धी महामार्गाला लागून टाकण्यात येत असलेल्या पाइपलाइनमधून १६ एमएमएससीएमडी इतका गॅस वहन करण्याची क्षमता आहे. गेल ही कंपनी देशभरात अशा प्रकारे पाइपलाइनद्वारे गॅस पोहोचवण्याचे काम करणारी यंत्रणा आहे. तूर्तास ६० टक्के काम पूर्ण झाले असून उर्वरित ४० टक्के काम आगामी चार ते पाच महिन्यांत पूर्ण होणार आहे. त्यानंतर स्थानिकस्तरावर गॅस वितरणाचे काम घेतलेल्या कंपन्यांकडून स्थानिक ठिकाणी काम सुरू होईल व नंतर नागरिकांना शहरात, जिल्ह्यात सीएनजीचे वितरण सुरू होईल, असे ‘गेल’च्या वरिष्ठ अधिकार्‍यांनी सांगितले.
नागपूरसाठी केसीई प्रायव्हेट लिमिटेड, वर्ध्यासाठी मेघा इंजिनिअरिंग अँड इन्फ्रास्ट्रक्चर लिमिटेड, अमरावती, यवतमाळ, वाशिम, अकोल्यासाठी अदानी टोटल गॅस, बुलडाण्यासाठी महाराष्ट्र नॅचरल गॅस लिमिटेड, जालन्यासाठी इंडियन ऑइल कॉर्पोरेशन ही कंपनी काम पाहणार आहे.
