बंडखोर आमदारांची निष्ठा संपली? कार्यालयातून हटवल्या ‘ठाकरे’ पितापुत्रांच्या प्रतिमा!
कोल्हापूर : (Aditya Thackeray On Rebel MLA Shinde Group) एकनाथ शिंदेंसह 40 आमदारांनी शिवसेनेशी केलेल्या बंडखोरीनंतर शिवसेना आणि शिंदे गटातील आरोप-प्रत्यारोपाचा वाद आता टोकाला जाताना दिसत आहे. तर एका बाजूला शिवसेना नेते आदित्य ठाकरे यांच्याकडून शिवसंवाद यात्रेत बंडखोर आमदारांवर सातत्याने गद्दार, बंडखोर, असे आरोप केले जात आहेत.
तर दुसऱ्या बाजूला ‘ठाकरे’ कुटुंबाशी निष्ठा आहे म्हणणारे, हेच बंडखोर आमदार आता ठाकरे कुटुंबावर तोंडसुख घेताना दिसत आहेत. संजय शिरसाट, अब्दुल सत्तार, तानाजी सावंत, शहाजी बापु पाटील, गुलाबराव पाटील यांसारखे बंडखोर आता उघडउघड बोलायला लागले आहेत. तर शिंदे गटातील काही आमदारांनी आता आपल्या कार्यालयामध्ये असलेले ठाकरे पितापुत्रांच्या प्रतिमा देखील आता हटवायला सुरुवात केली आहे.
बंडखोर आमदार संजय शिरसाट यांच्या कार्यालयाचे उद्घाटन ज्या उद्धव ठाकरेंच्या हस्ते करण्यात आले होते, आज त्याच ठाकरेंचा फोटो कार्यालयातून हटवण्यात आला आहे. यावरुन आदित्य ठाकरे म्हणाले, गेली महिनाभर हेच बंडखोर म्हणत होते की, आमचे उद्धव ठाकरे यांच्यावर प्रेम आहे. आदित्य ठाकरे हे आमच्यासाठी मुलासारखे आहेत, पण आता यांचा खरा चेहरा समोर यायला लागला आहे. असा हल्लाबोल कोल्हापुरातील शिवसंवाद यात्रेदरम्यान, आदित्य ठाकरेंनी बंडखोरांवर चढवला आहे.
