अंबाबाई मंदिरात गर्दीचा महापूर
तीन दिवसांत ३ लाखांवर भाविकांनी घेतले दर्शन
सिद्धीदेवी रूपातील अलंकार पूजा श्री दुर्गादेवीच्या ९ अवतारांपैकी (नवदुर्गा) नववा अवतार म्हणजे सिद्धिदात्री. देव, दानव, मानव आदींना सिद्धी प्रदान करणारी देवी म्हणजे सिद्धिदात्री. सिद्धी म्हणजे असामान्य क्षमता. मार्कण्डेय पुराणानुसार अणिमा, महिमा, गरिमा, लघिमा, प्राप्ती, प्राकाम्य, ईशित्व आणि वशित्व या ८ सिद्धी आहेत. ब्रह्मवैवर्त्तपुराणानुसार ह्या ८ धरून एकूण १८ सिद्धी आहेत.
कोल्हापूर : कोरोना महामारीमुळे दोन वर्षानंतर नवरात्रोत्सव निर्बंधाशिवाय होत असल्याने कोल्हापूर जिल्ह्यात दर्शनासाठी येणाऱ्या भाविकांची गर्दी दिवसेंदिवस वाढत आहे. सोमवारपासून नवरात्रोत्सव सुरू झाल्यापासून ते बुधवारपर्यंत साडेतीन शक्तिपीठांपैकी एक असलेल्या करवीर निवासिनी श्री अंबाबाई मातेच्या दर्शनासाठी तीन लाखांहून अधिक भाविकांनी दर्शन घेतले आहे.
मंगळवारी एक लाख ४४ हजार ९२१ भाविक आले होते. बुधवारी अंबाबाई मंदिरात एक लाख ४९ हजार ५८० भाविकांनी दर्शन घेतले. ५ ऑक्टोबरला दसऱ्यापर्यंत सुमारे २५ लाख भाविक मंदिरात येण्याचा अंदाज पश्चिम महाराष्ट्र देवस्थान समितीच्या अधिकाऱ्यांनी व्यक्त केला आहे. साधारणपणे नवरात्रीच्या पाचव्या माळेनंतर मंदिरात दर्शनासाठी भाविकांची वर्दळ असते. मात्र, या वेळी पहिल्या माळेपासून अंबाबाईच्या दर्शनासाठी भाविकांची पावले पडू लागली आहेत.
पर्यटकांची वर्दळ वाढल्याने हॉटेल, वसतिगृह, यात्री निवास आणि निवासस्थानेही पूर्णपणे व्यापली आहेत. सणासुदीच्या काळात या सुविधांचे दरही वाढले आहेत. तिसऱ्या माळेला देवीची सिद्धीदात्री रूपात अलंकार पूजा बांधण्यात आली होती. पुजारी आशुतोष कुलकर्णी, अनिल कुलकर्णी, श्रीनिवास जोशी आणि गजानन मुनीश्वर यांनी ही पूजा बांधली आहे.
उत्सवाच्या पाचव्या दिवशी अंबाबाईची पालखी टेंबलाई टेकडीवर येणार असल्याने ललित-पंचमीची टेंबलाई टेकडीवर तयारी जोरात सुरू आहे. कोल्हापूर जिल्ह्यातील वाडी-रत्नागिरी येथील प्रसिद्ध जोतिबाच्या मंदिरातही भाविकांची मोठी गर्दी होत आहे.
दरम्यान, नवरात्रोत्सवात महालक्ष्मी मंदिर परिसरात सुरक्षेच्या अनुषंगाने देवस्थान समितीने ड्रोन कॅमेऱ्याच्या साहाय्याने संपूर्ण उत्सवाचे चित्रीकरण करण्यात येत आहे. याद्वारे थेट प्रक्षेपणही करण्यात येत आहे.
