पोलीस भरतीसंदर्भात देवेंद्र फडणवीसांची मोठी घोषणा; म्हणाले…
मुंबई | Devendra Fadnavis – राज्याचे उपमुख्यमंत्री देवेंद्र फडणवीस (Devendra Fadnavis) यांनी पोलीस भरतीसंदर्भात मोठी घोषणा केली आहे. लवकरच राज्यात पोलीस दलातील 18 हजार जागांसाठी भरती प्रक्रिया राबवली जाणार आहे. आठवड्याभरात यासंदर्भात जाहिरात काढली जाईल, असं देवेंद्र फडणवीस म्हणाले. तसंच केंद्र सरकारनं 10 लाख तरूणांना रोजगार देण्यासंदर्भातील योजनेला आजपासून सुरूवात केली जाणार आहे. पहिल्या टप्प्यात 75 हजार तरूणांना रोजगार दिला जाईल असं सांगितलं जात आहे. या पार्श्वभूमीवर महाराष्ट्रातही रोजगार योजना राबवणार असल्याचं फडणवीस यांनी सांगितलं. ते नागपूर विमानतळावर प्रसारमाध्यमांशी बोलत होते.
यावेळी देवेंद्र फडणवीसांनी केंद्र सरकार राबवत असलेल्या रोजगार योजनेचं कौतुक केलं. “पंतप्रधान नरेंद्र मोदींनी खूप चांगला निर्णय घेतला आहे. 10 लाख तरूणांना रोजगार देण्याचा हा प्रकल्प आहे. आज 75 हजार तरूणांना नोकऱ्या देण्यात येणार आहेत”, असं देवेंद्र फडणवीस म्हणाले.
“आम्ही ठरवलंय की येत्या वर्षभरात महाराष्ट्रात 75 हजार तरूणांना नोकऱ्या द्यायच्या. त्याचाच एक भाग म्हणून आम्ही 18 हजार पोलिसांच्या भरतीची जाहिरातही येत्या आठवड्याभरात काढतो आहोत. मुख्यमंत्र्यांनी इतरही विभागांनाही निर्देश दिले आहेत. सगळ्या विभागांच्या जाहिराती काढून मोठ्या प्रमाणावर तरूणाईला नोकरभरतीत प्राध्यान्य देण्याचा प्रयत्न महाराष्ट्रातही केला जाणार आहे. रोजगार आणि स्वयंरोजगाराच्या संधीही आम्ही उपलब्ध करून देऊ”, असंही देवेंद्र फडणवीस म्हणाले.
