अब्दुल सत्तारांच्या शिवीगाळीनंतर सुप्रिया सुळेंची पहिली प्रतिक्रिया; म्हणाल्या…
मुंबई | Supriya Sule – राज्याचे कृषीमंत्री आणि शिंदे गटातील नेते अब्दुल सत्तार (Abdul Sattar) हे नेहमी त्यांच्या वादग्रस्त वक्तव्यांमुळे चर्चेत येत असतात. आता देखील ते चर्चेत आले आहेत. अब्दुल सत्तार यांनी संसदरत्न सुप्रिया सुळे (Supriya Sule) यांना शिवी दिल्याचा धक्कादायक प्रकार एका मुलाखतीमध्ये घडला आहे. एका वृत्तवाहिनीच्या पत्रकारानं सुप्रिया सुळेंनी केलेल्या टीकेच्या पार्श्वभूमीवर सत्तार यांना प्रश्न विचारला असता त्यांनी थेट सुळेंना कॅमेरासमोरच शिवी दिल्याचं दिसून आलं आहे. या संपूर्ण घटनेचा व्हिडीओ सध्या सोशल मीडियावर व्हायरल होत असून सत्तारांच्या विधानासंदर्भात अनेकांनी संताप व्यक्त केला आहे. यामध्ये आता सुप्रिया सुळे यांनी देखील यासंदर्भात पहिली प्रतिक्रिया दिली आहे.
अब्दुल सत्तारांच्या वादग्रस्त वक्तव्यावर सुप्रिया सुळेंनी संयमी भूमिका घेतली आहे. आपण सत्तार यांच्या वक्तव्यावर कोणतीही प्रतिक्रिया देणार नाही, असं सुळे म्हणाल्या आहेत. मात्र, दुसरीकडे राष्ट्रवादी काँग्रेस आक्रमक झाली असून त्यांनी अब्दुल सत्तारांनी माफी मागण्यास सांगितलं आहे.
दरम्यान, औरंगाबादमध्ये ‘लोकशाही’ वृत्तवाहिनीच्या प्रतिनिधिंशी बोलताना अब्दुल सत्तार यांना सुप्रिया सुळेंबद्दल प्रश्न विचारण्यात आला. तुम्ही सुप्रिया सुळेंना खोके देण्याची ऑफर केल्यावरुन त्यांनी तुमच्याकडे आले असतील खोके म्हणूनच तुम्ही खोके देण्यासाठी तयार झाला आहात, असं म्हटलं आहे. यावर काय सांगाल असं सत्तार यांना विचारण्यात आलं. यावर उत्तर देताना सत्तार यांनी सुप्रिया सुळेंचा एकेरी उल्लेख करत त्यांच्यावर शिवीगाळ केली. “इतकी भिकार** झाली असेल सुप्रिया सुळे तर तिलाही देऊ,” असं वादग्रस्त विधान अब्दुल सत्तारांनी केलं आहे.
