मराठवाड्यात सभांचा धुराळा! ठाकरे Vs शिंदे-फडणवीस-पवार सामना रंगणार; कोणाची बाजी
औरंगाबाद : (Uddhav Thackeray On Shinde-Fadnvavis) आगामी निवडणुका पाहता सर्वच पक्ष कामाला लागले असून, राज्यभरात महत्त्वाच्या नेत्यांच्या सभांचा धुराळा पाहायला मिळत आहे. आज मराठवाड्यात ‘सभांची जत्रा’ पाहायला मिळणार आहे. एकाच दिवशी मुख्यमंत्री, दोन माजी मुख्यमंत्री, दोन मुख्यमंत्री यांच्यामध्ये सामना रंगणार आहे. एक बाजूला उद्धव ठाकरे आहेत, तर दुसऱ्या बाजूला शिंदे-फडणवीस-पवार यांच्यामध्ये कोण बाजी मारणार हे पाहाणं महत्त्वाचं ठरणार आहे.
वेगवेगळ्या ठिकाणी आज सत्ताधारी नेत्यांसह विरोधी पक्षातील नेत्यांची सभा होत आहे. परभणी जिल्ह्यात शासन आपल्या दारी कार्यक्रमानिमित्ताने होणाऱ्या सभेत मुख्यमंत्री एकनाथ शिंदे (CM Eknath Shinde), उपमुख्यमंत्री देवेंद्र फडणवीस (Devendra Fadnavis), उपमुख्यमंत्री अजित पवार (Ajit Pawar) यांच्यासह अनेक मंत्री उपस्थित राहणार आहे. तर बीड जिल्ह्यात अजित पवारांची सभा होणार असून, या ठिकाणी देखील राष्ट्रवादीचे अनेक मंत्री सहभागी होणार आहेत. तर, दुसरीकडे माजी मुख्यमंत्री उद्धव ठाकरे (Uddhav Thackeray) यांची हिंगोलीत सभा होणार आहे.
परभणीत आज शासन आपल्या दारी कार्यक्रमाचे आयोजन करण्यात आल आहे. परभणीच्या वसंतराव नाईक मराठवाडा कृषी विद्यापीठाच्या मैदानावर हा कार्यक्रम होत आहे. उपमुख्यमंत्री अजित पवार आज बीड शहरात पहिल्यांदाच येत असून, बीड शहरांमध्ये अजित पवार यांच्या स्वागतासाठी आणि सभेसाठी जय्यत तयारी करण्यात आली आहे. विशेष म्हणजे काही दिवसांपूर्वी याच बीडमध्ये शरद पवारांनी सभा घेतली होती. त्यांच्या सभेला उत्तर देण्यासाठी अजित पवार यांची आज सभा होत असल्याचे बोलले जात आहे.
एकीकडे मराठवाड्यात आज सत्ताधारी पक्षाच्या नेत्यांच्या सभा होत असतानाच, दुसरीकडे उद्धव ठाकरेंची देखील हिंगोलीत सभा होत आहे. शिंदे गटाचे आमदार संतोष बांगर यांचा हा जिल्हा असून, उद्धव ठाकरे या ठिकाणी काय बोलणार हे पाहणं महत्वाचे ठरणार आहे. विशेष म्हणजे शिवसेनेते झालेल्या बंडखोरीनंतर उद्धव ठाकरे यांनी शिंदे गटाच्या अनेक महत्त्वाच्या नेत्यांच्या जिल्ह्यात सभा घेण्याचा निर्णय घेतला होता. त्याचाच एक भाग म्हणून आज उद्धव ठाकरे हिंगोलीत सभा घेत असल्याचे पाहायला मिळत आहे.
