लष्कर-ए-तोयबाचा उपप्रमुख अब्दुल रहमान मक्की जागतिक दहशतावादी म्हणून घोषित
संयुक्त राष्ट्राच्या सुरक्षा परिषदेच्या अल कायदा निर्बंध समितीने लष्कर-ए-तोयबा या दहशतवादी संघटनेचा उपप्रमुख अब्दुल रहमान मक्की याला जागतिक दहशतवादी म्हणून घोषित केले आहे. या निर्णयानंतर अब्दुल मक्की याची संपत्ती जप्त करण्यात येणार आहे. त्याला प्रवासबंदी तसेच शस्त्र बाळगण्यावर बंदी असे निर्बंध त्याच्यावर लादण्यात येणार आहेत.
मक्की हा लष्कर ए तोयबाचा प्रमुख हाफीज मोहम्मह सईद याचा मोहुणा आहे. ही घोषणा करताना “मक्की तसेच एलईटी, जेयूडी संघटनेतील लोक दहशतवादी कारवायांसाठी निधी उभारणे, संघटनेत तरुणांची भरती करणे, तरुणांना हिंसा करण्यास भडकावणे, भारतात दहशतवादी हल्ले घडवणे अशा कारवायांत सहभागी आहेत,” असे निरीक्षण संयुक्त राष्ट्राने नोंदवले. दहशतवादी कारवायांना रोखण्याच्या प्रयत्नात भारताला हे मोठे यश मिळाल्याचे म्हटले जात आहे.
मक्कीला दहशतवादी म्हणून घोषित केले जावे, अशी भारताची पूर्वीपासूनची मागणी होती. मात्र या मागणीला चीनने याआधी विरोध केलेला आहे. मागील वर्षी जून महिन्यात अमेरिका आणि भारताने मक्कीला दहशतवादी घोषित करावे, अशा मागणीचे संयुक्त निवेदन दिले होते. मात्र चीनने ऐनवेळी या मागणीला विरोध केला होता.
