…म्हणून ममता बॅनर्जींनी बोलावलेल्या बैठकीला मुख्यमंत्री ठाकरे अनुपस्थित राहणार
मुंबई | Presidential Election 2022 – राष्ट्रपती निवडणुकीच्या अनुषंगाने पश्चिम बंगालच्या मुख्यमंत्री ममता बॅनर्जी यांनी १५ जून रोजी बैठक बोलावली आहे. ममता बॅनर्जी यांनी या बैठकीचे आमंत्रण भाजविरोधी पक्षांना दिले आहे. मात्र, या बैठकीत महाराष्ट्राचे मुख्यमंत्री उद्धव ठाकरे उपस्थित राहणार नसल्याची माहिती आहे. तसंच या बैठकीत शिवसेनेकडून कोण सहभागी होणार, याबाबतही काहीच स्पष्ट झालं नाही. मुख्यमंत्री उद्धव ठाकरे यांचे काही पूर्वनियोजित कार्यक्रम असल्यामुळे ते या बैठकीत सहभागी होणार नसल्याची माहिती सूत्रांनी दिली.
ममता बॅनर्जी यांनी बोलावलेली बैठक एकतर्फी असल्याचं म्हटलं जात आहे. ममता यांनी बैठकीचा दिवस ठरवण्याआधी चर्चा न करता पत्र पाठवलं असल्याचं म्हटलं जात आहे. मुख्यमंत्री उद्धव ठाकरे हे पूर्वनियोजित कार्यक्रमामुळे बैठकीस जाणार नाहीत. तर, दुसरीकडे शिवसेना नेते आणि राज्याचे पर्यावरण मंत्री आदित्य ठाकरे हे १५ जून रोजी अयोध्या दौऱ्यावर असणार आहेत. शिवसेना नेते संजय राऊत यांच्यासह इतर नेतेही या दौऱ्यावर असणार आहेत. त्यामुळे आदित्य ठाकरे आणि संजय राऊतदेखील या बैठकीसाठी उपस्थित राहणार नाहीत.
दरम्यान, ममता बॅनर्जी यांनी राष्ट्रपतीपदाच्या निवडणुकीसाठी सर्व भाजपविरोधकांची बैठक १५ जून रोजी बोलावली आहे. मात्र, ममता बॅनर्जी यांनी बोलावलेली ही बैठक एकतर्फी असल्याचं इतर पक्षांनी म्हटलं आहे. विशेष म्हणजे काँग्रेस, राष्ट्रवादी काँग्रेस, व इतर पक्षांनी याआधीच 15 जून रोजी बैठक घेण्याचं निश्चित केलं आहे.
