“नुसतं झाडाला मिठी मारून…”, अभिनेता सुमीत राघवनचं ट्विट चर्चेत

मुंबई | Sumeet Raghvan’s Tweet In Discussion – सध्या राज्यात ‘आरे’वरुन चांगलंच वातावरण तापलं आहे. ‘मेट्रो 3’साठीचे कारशेड आरेतच होणार अशी भूमिका नव्या सरकारने घेतली आहे. मात्र, मुंबईच्या फुफ्फुसावर सरकारला घाव घालू देणार नाही, असं ठाम मत व्यक्त करत पर्यावरणप्रेमींनी ‘आरे वाचवा’ची हाक दिली आहे. तर अभिनेता सुमीत राघवन मात्र आरे आंदोलकांच्या विरोधात आहे. यासंदर्भात त्यानं एक ट्विट करत आरे आंदोलकांवर निशाणा साधला आहे.

सुमीत राघवनने त्याच्या ट्विटर अकाऊंटवरून एक पोस्ट शेअर केली आहे. ही पोस्ट शेअर करत, “आंदोलकांनी नुसतं फलक घेऊन, झाडाला मिठी मारून प्रेम दाखवण्यापेक्षा जरा स्वत:च्या खिशातले पैसे खर्च करून पर्यावरणासाठी काहीतरी चांगलं करायला सांगा. समाजाचं आणि प्राण्यांचं भलं करा. आपलं योगदान करत महाराष्ट्र सरकारचा भार थोडा हलका करा, बरोबर?” असं ट्विट त्यानं केलं आहे.

पुढे सुमीतनं आणखी एक ट्विट केलं आहे. “कारशेड समर्थक देखील पर्यावरणाच्या विरोधात नाही, हे सत्य जाणून घ्या. तुम्हाला आणि तुमच्या पिढीला योग्य वाटेल ते सांगून खोटं काही पसरवू नका. संजय गांधी राष्ट्रीय उद्यानातील संजय कांबळे यांना भेटा, म्हणजे कळेल,” असं सुमीतनं म्हटलं आहे.