अजित पवार आमचेच नेते; शरद पवारांच्या वक्तव्याने खळबळ

मुंबई | Sharad Pawar – राष्ट्रवादी काँग्रेस पक्षात फूट पडली असून शरद पवार (Sharad Pawar) आणि अजित पवार (Ajit Pawar) असे दोन गट पडले आहेत. अशातच सुप्रिया सुळे (Supriya Sule) यांनी राष्ट्रवादीत फूट पडली नसल्याचं सांगितलं. तसंच अजित पवार हे आमचे नेते आहेत, असंही त्या म्हणाल्या होत्या. यादरम्यान, आता शरद पवार यांनीही मोठं वक्तव्य केलं आहे.
अजित पवार हे आमचेच नेते आहेत, असं वक्तव्य शरद पवार यांनी केलं आहे. त्यांनी केलेल्या या वक्तव्यानंतर राजकीय वर्तुळात एकच खळबळ उडाली आहे. आधी सुप्रिया सुळे आणि नंतर शरद पवारांनी केलेल्या या वक्तव्यानंतर आता संभ्रम निर्माण झाला आहे.
राष्ट्रवादीमध्ये कोणतीही फूट पडलेली नसून अजित पवार हे आमचेच नेते आहेत, असं सुप्रिया सुळेंनी म्हटलं होतं. याबाबत शरद पवार म्हणाले की, हो आहेतच, त्यात काहीच वाद नाही. फूट पडणे याचा अर्थ काय? पक्ष कधी फुटतो, जर पक्षात एक मोठा वर्ग वेगळा झाला. आज तशी परिस्थिती नाहीये. वेगळा निर्णय घेतला म्हणजे फूट म्हणण्याचं कारण नाही, हा त्यांचा निर्णय आहे.