“आमच्या हिंदू धर्मावर घाला घालणाऱ्याचे हात…”, अमोल कोल्हेंची ‘ती’ पोस्ट चर्चेत!
मुंबई | Amol Kolhe’s Post In Discussion – नुकत्याच प्रदर्शित झालेल्या ‘शिवप्रताप गरूडझेप’ चित्रपटातील टीझरने सर्वांचं लक्ष वेधून घेतलं आहे. या टीझरमध्ये औरंगजेबाचा कपटी अवतार आणि छत्रपती शिवाजी महाराजांचा धैर्यशील बाणा पहायला मिळतो आहे. त्यामुळे हा टीझर सध्या सोशल मीडियावर चांगलाच व्हायरल होत आहे.
‘शिवप्रताप गरूडझेप’ चित्रपटाच्या टीझरमध्ये औरंगजेब उत्तरेत हिंदू मंदिरे पाडताना आणि प्रजेवर अन्याय करताना दिसतो. “तेरा ईश्वर तो नही आया तुझें बचाने, कौन आएगा” असं म्हणताना दिसतो. त्यानंतर डॉ. अमोल कोल्हे यांची छत्रपती शिवाजी महाराजांच्या भूमिकेतील दमदार एण्ट्री पहायला मिळते. “यापुढे आमच्या धर्मावर जो कोणी घाला घालेल त्याचे हात मुळासकट उखडून देण्याची धमक आम्ही बाळगतो..!” अशा कडक शब्दात छत्रपती शिवाजी महाराजांनी औरंगजेबाला सुनावलं आहे. सह्याद्रीच्या ‘नरसिंहाची ही शिवगर्जना’ प्रदर्शित झालेल्या ‘शिवप्रताप गरुडझेप’च्या या टीझर मधून पहायला मिळत आहे.
दरम्यान, या चित्रपटात डाॅ. अमोल कोल्हे हे छत्रपती शिवाजी महाराजांच्या भूमिकेत दिसत आहेत. तर अभिनेते यतीन कार्येकर क्रुर मुघलशासक औरंगजेबाची व्यक्तिरेखा साकारताना दिसणार आहेत. या टीझरने प्रेक्षकांची उत्सुकता चांगलीच वाढवली आहे. विजयादशमीच्या मुहूर्तावर 5 ऑक्टोबरला ‘शिवप्रताप गरुडझेप’ हा चित्रपट प्रेक्षकांच्या भेटीस येणार आहे. ‘जगदंब क्रिएशन’ प्रस्तुत करीत असलेल्या डॉ. अमोल रामसिंग कोल्हे निर्मित या चित्रपटाचं दिग्दर्शन कार्तिक राजाराम केंढे यांनी केलं आहे.
