अखेर प्रतीक्षा संपली! उद्या होणार शिंदे-फडणवीस सरकारचा मंत्रिमंडळ विस्तार?
मुंबई : Maharashtra Cabinet Expansion – राज्यात शिंदे-फडणवीस सरकार स्थापन होऊन महिना उलटून गेला आहे. तरीही मंत्रिमंडळ विस्तार रखडला आहे. याच दरम्यान केंद्रीय गृहमंत्री अमित शहा यांच्याशी चर्चा झाल्यानंतरच मंत्रिमंडळ विस्तार होणार असल्याची माहिती समोर आली होती. आता मंत्रिमंडळ विस्तार हा उद्याच होण्याची शक्यता आहे. तसंच मुख्यमंत्री एकनाथ शिंदे यांच्या मंत्रिमंडळात काही जुन्या तर काही नव्या नावांना संधी मिळणार आहे. उद्या (5 ऑगस्ट) भाजपचे 8 तर शिंदे गटामधील सात जण मंत्रिपदाची शपथ घेऊ शकतात, अशी माहिती समोर आली आहे. भाजपकडे स्वतःचे आणि अपक्ष असे 115 आमदार आहेत. तर शिंदे यांच्याकडे शिवसेना आणि अपक्ष असे 50 आमदार आहेत.
शिंदे-फडणवीस सरकारच्या मंत्रिमंडळ विस्ताराबाबत अद्याप अधिकृत माहिती समोर आलेली नाही. मात्र, सुत्रांनी दिलेल्या माहितीनुसार, शुक्रवारी संध्याकाळी राजभवनावर मंत्रिमंडळ विस्तार होणार आहे. तसंच मंत्रिमंडळ विस्ताराच्या मुद्द्यावरुन विरोधकांकडून नव्या सरकारवर ताशेरे ओढले जात आहेत. सत्ता स्थापन झाल्यानंतर पहिल्या आठवड्यातच मंत्रिमंडळ विस्तार होणे अपेक्षित होतं परंतु चार आठवडे झाले तरी विस्तार होत नाही त्यामुळे मंत्रिमंडळ विस्तारात नेमकी अडचण काय? असा प्रश्न उपस्थित झाला आहे.
मिळालेल्या माहितीनुसार, राज्यपालांचा सहा तारखेला नियोजित दिल्ली दौरा आहे. तर सात तारखेला निती आयोगाची बैठक आहे, त्यामध्ये सहभागी होण्यासाठी एकनाथ शिंदे यांना दिल्लीला जायचं आहे. त्यामुळे त्याआधी मंत्रिमंडळ विस्तार होण्याची शक्यता आहे. बुधवारी शिंदे गटाचे प्रवक्ते दीपक केसरकर यांच्यावतीनेही मंत्रिमंडळ विस्ताराबाबत संकेत देण्यात आले आहेत. रविवारच्या आधी मंत्रिमंडळ विस्तार होईल, असं केसरकर यांनी स्पष्ट केलं आहे. त्यामुळे लवकरच याबाबत अधिकृत घोषणा होण्याची शक्यता आहे.
