“रोहित पवार हे बिनडोक आहेत, त्यांना…”, गोपीचंद पडळकरांची सडकून टीका
पुणे | Gopichand Padalkar On Rohit Pawar – राष्ट्रवादी काँग्रेसचे आमदार रोहित पवार (Rohit Pawar) यांनी आमदार गोपीचंद पडळकर (Gopichand Padalkar) यांच्यावर टीका केली होती. गोपीचंद पडळकर हे चॉकलेट बॉय असून ते प्रसिद्धीसाठी शरद पवार (Sharad Pawar) यांच्यावर टीका करत असतात, त्यामुळे त्यांना गांभीर्याने घेण्याची गरज नाही. अशा शब्दात रोहित पवारांनी गोपीचंद पडळकरांवर टीका केली होती. त्यांच्या या टीकेला आता पडळकरांनी खोचक शब्दांत प्रत्युत्तर दिलं आहे. रोहित पवार हे बिनडोक आहेत. त्यांना महाराष्ट्रातील राजकारणात बोटं घालण्याची सवय आहे. असा खोचक टोला त्यांनी रोहित यांना लगावला आहे.
तसंच MPSC तरुणांच्या आंदोलनाचं श्रेय शरद पवारांना घ्यायचे आहे म्हणून ते बैठक घडवून आणत आहेत. प्रत्यक्षात तर विद्यार्थ्यांचे प्रश्न मुख्यमंत्री एकनाथ शिंदे (CM Eknath Shinde) आणि उपमुख्यमंत्री देवेंद्र फडणवीस (Devendra Fadnavis) सोडवत आहेत. असंही गोपीचंद पडळकर म्हणाले. पडळकर चिंचवड कसबा पोटनिवडणुकीत भाजप उमेदवार अश्विनी लक्ष्मण जगताप यांच्या प्रचारार्थ पुण्यात आले होते. त्यावेळी त्यांनी रोहित पवारांवर टीकास्त्र सोडलं.
पुणे आणि चिंचवड येथील भाजपचे (BJP) उमेदवार मोठ्या फरकानं निवडून येतील, असा विश्वास पडळकरांनी व्यक्त केला आहे. तसंच रोहित पवार हा बिनडोक माणूस आहे. त्यांनी त्यांच्या उमेदवाराच्या विरोधात काय स्टेटमेंट केलंय ते तुम्ही पाहिलं आहे. मेंढराच्या डागनीनं डागल तर ते सुधारणार नाहीत. खुरप्यानं डागावं लागेल. मग त्यांना कुठेतरी अक्कल येईल, अशी टीका पडळकरांनी केली आहे.
