गतवर्षीच्या तुलनेत पाच स्थानांनी दर्जा घसरला

एनआयआरएफच्या रँकिंगमध्ये उतरती कळा

रँकिंगमध्ये सार्वजनिक विद्यापीठात महाराष्ट्रातील आपले प्रथम स्थान अढळ आहे. मात्र राज्य विद्यापीठ म्हणून आपल्या काही मर्यादा असल्याने परदेशी विद्यार्थ्यांची संख्या कमी आहे. कलकत्त्याचे जाधवपुर विद्यापीठ हे सार्वजनिक विद्यापीठात देशात प्रथम आहे. मात्र तेथे केवळ शिक्षकांची संख्या १२०० आहे तर आपल्याकडे मंजूर शिक्षक ३६८ असून त्यातील ५० टक्के जागा रिक्त आहेत. त्यामुळे भविष्यात आपले स्थान कायम ठेवायचे असेल तर राज्य सरकारचे सहकार्य गरजेचे आहे.
— डॉ.संजीव सोनवणे
(प्र – कुलगुरू, सावित्रीबाई फुले पुणे विद्यापीठ)

ओव्हरऑल रँकिंगमध्ये
१) मुंबई आयआयटी – तिसरे स्थान (८२.३५)
२) सावित्रीबाई फुले पुणे विद्यापीठाने २५ वे स्थान (५६.९९)
३) इंडियन इन्स्टिट्यूट ऑफ सायन्स एज्युकेशन अँड रिसर्च या पुण्याच्या संस्थेने २६ वे स्थान (५६.९१)
४) मुंबईच्या इन्स्टिट्यूट ऑफ केमिकल टेक्नॉलॉजीने २८ वे (५६.१६) स्थान पटकावले आहे.
५) मुंबईच्या होमी भाभा नॅशनल इन्स्टिट्यूटने ३३ वे (५४.८४) स्थान पटकावले आहे.

पुणे : राष्ट्रीय पातळीवर देशभरातील शैक्षणिक संस्थांचे मूल्यांकन करणार्‍या ’नॅशनल इन्स्टिट्यूशनल रँकिंग फ्रेमवर्क’ २०२२ ची क्रमवारी जाहीर झाली. सावित्रीबाई फुले पुणे विद्यापीठ हे विद्यापीठांच्या क्रमवारीत बाराव्या स्थानावर आहे. एनआयआरएफ रँकिंगमध्ये विद्यापीठाच्या कामगिरीची गेल्या वर्षाशी तुलना केली, तर २०२१ मध्ये १०० विद्यापीठांच्या यादीत पुणे विद्यापीठ ११ व्या स्थानावर होते. मात्र यंदा १२ वे स्थान विद्यापीठाला मिळाले आहे.

गतवर्षीच्या तुलनेत विद्यापीठांच्या रँकिंगमध्ये एका अंकाने, तर सर्वच शैक्षणिक संस्थांच्या रँकिंगमध्ये पाच स्थानांनी घसरण झाल्याचे दिसून आले आहे. त्यामुळे विद्यापीठाचा दर्जा घसरल्याचे चित्र दिसून येत आहे.विद्यापीठांच्या यादीत जरी केवळ एकाच स्थानाची घसरण झाली असली, तरी देशस्तरावरील सर्व संस्थांची गेल्या वर्षीची तुलना केली तर विद्यापीठ २० व्या स्थानावर होते. यंदा त्यात मोठी घसरण होऊन विद्यापीठ थेट २५ व्या स्थानावर घसरले आहे. सावित्रीबाई फुले पुणे विद्यापीठ हे गेली काही वर्षे सातत्याने वरच्या क्रमांकावर असून, राज्यातून देशपातळीवर आघाडीवर असणारे राज्यातील पहिले सार्वजनिक विद्यापीठ आहे. या क्रमवारीत सावित्रीबाई फुले पुणे विद्यापीठाचे एकूण गुण ५९.४८ असून, मागील वर्षी ही गुणांची आकडेवारी ५८.३४ होती.
मात्र, महाराष्ट्रात २०२०-२१ मध्ये कोविड १९ ची दुसरी लाट असतानाही पुणे विद्यापीठाने आपली संशोधनातील गुणवत्ता, उद्योग आणि शिक्षण सहकार्य, विद्यार्थ्यांना रोजगाराच्या संधी, तसेच सामाजिक व राष्ट्रीय कार्यात मोलाची भूमिका बजावली
आहे.