केदार जाधवचे वडील सापडण्यात पुणे पोलिसांना यश

पुणे : भारतीय संघाचा क्रिकेटपटू केदार जाधव (Kedar Jadhav’s father Mahadev jadhav Found) याचे ७५ वर्षीय वडील महादेव जाधव (Mahadev Jadhav) सोमवारी सकाळी साडेअकराच्या सुमारास पुण्यात मॉर्निंग वॉक करत असताना बेपत्ता झाले होते. मात्र, कोथरूड पोलिसांना काही तासांच्या शोधानंतर सायंकाळी महादेव जाधव यांना सापडण्यात यश मिळाले.

पोलिसांनी सांगितले की, महादेव जाधव यांना स्मृतिभ्रंश आहे, म्हणजेच त्यांची लक्षात ठेवण्याची क्षमता कमी झालेली आहे. त्यामुळे ते बेपत्ता झालेले होते. महादेव जाधव हे मुंढवा परिसरात सापडले. सध्या ते त्यांच्या कुटुंबीयांसोबत आहेत.

सकाळी गायब झाल्यानंतर काही वेळाने महादेव जाधव यांचा फोन बंद लागत होता. केदार जाधव यांच्या कुटुंबीयांनी अलंकार पोलीस ठाण्यात महादेव जाधव हे बेपत्ता झाल्याची तक्रार दाखल केली होती. पोलिसांनी सीसीटीव्ही फुटेज मिळवले त्यात ते शेवटचे कर्वे नगरमध्ये दिसले होते. काही तासांच्या शोधानंतर ते मुंढवा परिसरात सापडले.