चित्रपटाच्या निमित्ताने नागराज मंजुळे, सयाजी शिंदे यांनी घेतली चंद्रपूर पोलिसांची भेट
Ghar Banduk Biryani : नागराज पोपटराव मंजुळे (Nagraj Manjule) आणि झी स्टुडिओज प्रस्तुत, आटपाट निर्मित, हेमंत जंगल अवताडे दिग्दर्शित ‘घर बंदूक बिरयानी’ ( Ghar Banduk Biryani) हा चित्रपट लवकरच प्रेक्षकांच्या भेटीला येणार आहे. या चित्रपटाच्या निमित्ताने नागराज पोपटराव मंजुळे, सयाजी शिंदे (Sayaji Shinde), आकाश ठोसर (Akash Thosar), सायली पाटील (Sayli Patil) अशी संपूर्ण टीम महाराष्ट्र दौरा करीत आहे. ‘घर बंदूक बिरयानी’ या चित्रपटाची संपूर्ण टीम चंद्रपूरमध्ये दाखल झाली होती. नागराज पोपटराव मंजुळे आणि सयाजी शिंदे यांनी नक्षलवाद्यांशी स्वतः दोन हात केलेल्या चंद्रपूरमधील C16 बटालियनच्या पोलिसांशी संवाद साधून त्यांच्या सोबत वेळ घालवला. या चित्रपटाचा ट्रेलर पाहताना बटालियनने टाळ्या आणि शिट्ट्यांच्या आवाजात नागराज आणि सयाजी शिंदे यांचं स्वागत केलं.
या चित्रपटात नागराज अस्सल मातीतला, तडफदार पोलीस अधिकाऱ्याची भूमिका साकारत आहेत. आशेच्या भांगेची नशा भारी अशी टॅगलाईन असणाऱ्या ‘घर बंदूक बिरयानी’ या चित्रपटाच्या ट्रेलरमध्ये पोलीस, डाकू यांच्यात चकमक होताना दिसत आहे. यात एका तरुणाचाही सहभाग दिसत आहे. आता यांच्यात नक्की कशावरून ही चकमक सुरु आहे आणि घर, बंदूक आणि बिर्याणीचा याच्याशी नेमका काय संबंध, याचे उत्तर प्रेक्षकांना 7 एप्रिल रोजी मिळणार आहे.
या चित्रपटात नागराज मंजुळे ॲक्शन मोडमध्ये तर सयाजी शिंदे अत्यंत रावडी आणि तडफदार अंदाजात दिसत आहेत. आकाशची रोमँटिक इमेज तरुणांना भावणारी आहे. हा एक ॲक्शन चित्रपट असला तरी त्यात कौटुंबिक कथा आणि प्रेमकहाणीसुद्धा आहे. आतापर्यंत या चित्रपटातील तीन गाणी प्रदर्शित झाली असून त्यांना प्रेक्षकांकडून चांगला प्रतिसाद मिळाला.
