ग्रामीण भागात गुणवत्तापूर्ण खेळाडू घडावेत
पुणे : जिल्ह्याच्या तळागाळापर्यंत शिक्षणाची गंगा पोहोचविण्यासाठी विद्यार्थी केंद्रबिंदू मानून पुणे जिल्हा शिक्षण मंडळाने केलेले कार्य प्रेरणादायी आहे. विशेषतः अजित पवार यांच्या दूरदृष्टीने व कल्पक नेतृत्वाने पुणे जिल्हा शिक्षण मंडळ यशाच्या शिखरावर वाटचाल करीत आहे. त्यामुळे त्यांच्या वाढदिवसानिमित्त आयोजित पुणे ते बारामती राष्ट्रीय सायकल स्पर्धेमध्ये ग्रामीण भागातील खेळाडूंना आपले कौशल्य दाखविण्याची संधी असून, यामधून राज्याचे व देशाचे नाव उज्ज्वल करणारे गुणवत्तापूर्ण खेळाडू घडतील, असे प्रतिपादन महाराष्ट्र राज्याचे माजी गृहमंत्री दिलीप वळसे-पाटील यांनी केले.
महाराष्ट्र राज्याचे माजी उपमुख्यमंत्री, विरोधी पक्षनेते व पुणे जिल्हा शिक्षण मंडळाचे अध्यक्ष अजित पवार यांच्या वाढदिवसानिमित्त शनिवारवाडा येथे महाराष्ट्रातील अग्रगण्य शैक्षणिक संस्था पुणे जिल्हा शिक्षण मंडळातर्फे आयोजित राष्ट्रीय व राज्यस्तरीय सायकल स्पर्धेच्या शुभारंभ प्रसंगी ते बोलत होते. याप्रसंगी सावित्रीबाई फुले पुणे विद्यापीठाचे प्र-कुलगुरू डॉ. संजीव सोनवणे, विधानसभा सदस्य आ. रोहित पवार, पुणे शहर राष्ट्रवादी काँग्रेस शहराध्यक्ष प्रशांत जगताप, महाराष्ट्र ॲालिम्पिक असोसिएशनचे सचिव बाळासाहेब लांडगे, मा. महापौर मुरलीधर मोहोळ, अंकुश काकडे, मा. महापौर दीपक मानकर, सिनेअभिनेते महेश कुलकर्णी, सिनेअभिनेत्री प्राजक्ता गायकवाड, प्रवक्ते प्रदीप देशमुख, अधिष्ठाता डॉ. विजय खरे, अधिष्ठाता डॉ. दीपक माने, अधिष्ठाता डॉ. मनोहर चासकर, बाबुराव चांदेरे, सुनील चांदेरे, सुनील जगताप यांची प्रमुख उपस्थिती होती. विद्यार्थ्यांच्या सर्वांगीण विकासासाठी पुणे विद्यापीठ नेहमी कटिबद्ध असल्याचे मत सावित्रीबाई फुले पुणे विद्यापीठाचे प्र-कुलगुरू डॉ. संजीव सोनवणे यांनी व्यक्त केले.
