सुप्रीम कोर्टाचं ऐकू की…; सुनावणीदरम्यान राहुल नार्वेकर वैतागले
मुंबई : (Rahul Narvekar On Supreme Court) विधानसभा अध्यक्ष राहुल नार्वेकर यांच्यासमोर आमदार अपात्रतेसंबंधी सुनावणी सुरु आहे. यावेळी नार्वेकर वैतागल्याचं पाहायला मिळालं. सुप्रीम कोर्टाचं ऐकायचं की स्वत: निर्णय घ्यायचा, असं म्हणत त्यांनी ठाकरे गटाला सुनावल्याचं सांगण्यात येतंय.
ठाकरे गटाने विधानसभा अध्यक्षांसमोर युक्तीवाद करताना म्हटलं की, ‘सुप्रीम कोर्टाने तुम्हाला लक्ष्मणरेषा आखुण दिली आहे. त्या चौकटीतच तुम्हाला निर्णय द्यायचा आहे. सुप्रीम कोर्टाने तुम्हाला प्रथमदर्शी चौकशी करण्याचे निर्देश दिले आहेत. त्यामुळे संपूर्ण पुरावे पाहण्याची गरज नाही.’ ठाकरे गटाच्या या युक्तीवादाने नार्वेकर काहीसे संतापले. मी सुप्रीम कोर्टाचं ऐकू की स्वत: निर्णय घेऊ, असं म्हणत त्यांनी त्रागा व्यक्त केला.
ठाकरे पटाने अध्यक्षांसमोर युक्तीवाद करताना म्हटलं की, ‘अध्यक्षांची भूमिका नियम पुस्तिकेत सांगितली आहे. भ्रष्टाचार हे कारण सरकार पाडण्यासाठी ग्राह्य धरता येत नाही. सत्तांतराकाळात काय घडलं इतकंच तुम्हाला पाहायचं आहे. राजकीय पक्षाची संरचना पाहण्याची आता गरज नाही. शिंदे गटाची याचिका पूर्णपणे बेकायदेशीर आहे.’
शिंदे गटाने युक्तीवाद करताना पुढील मुद्दे मांडले.अपात्रतेबाबत अध्यक्षांचे अधिकार अबाधित आहे. तसंच प्रतोद कोण आहे हेही पाहायला हवं.सर्वोच्च न्यायालयानं अध्यक्षांच्या अधिकाराबाबात दिलेले वेगवेगळ्या निर्णयाचा दाखला शिंदे गटाच्या वकीलांनी यावेळी दिला. मुख्य राजकीय पक्ष कोण? कोण व्हीप जारी करु शकतं? व्हीप कसा लागू होऊ शकतो? व्हीप देण्याचं माध्यम काय? हे प्रश्न पाहायला हवे. त्याचे पुरावे द्यायला हवेत. यासाठी अध्यक्षांनी १४ दिवसांची मुदत द्यावी. पुराव्यासाठी वेळ दिल्यास कायद्याचे उल्लंघन होणार नाही, असं शिंदे गटाने म्हटलं.
