‘सैराट’ फेम ‘प्रिन्स’ने फसवणुकीच्या आरोपावर दिलं स्पष्टीकरण; म्हणाला…
मुंबई | Suraj Pawar – काही दिवसांपूर्वी ‘सैराट’ (Sairat) फेम प्रिन्सची (Prince) भूमिका करणारा अभिनेता सुरज पवार (Suraj Pawar) चांगलाच चर्चेत आला होता. त्याच्यावर एकाने फसवणुकीचा आरोप केला होता. मंत्रालयात नोकरीचं आमिष देऊन शिर्डीतील एका व्यक्तीला फसवल्याचा आरोप त्याच्यावर केला गेला होता. दरम्यान, या प्रकरणावर आता सुरजने स्पष्टीकरण दिलं आहे.
सुरजने त्याच्या फेसबुक अकाउंटवर एक पोस्ट शेअर केली आहे. यात त्याने लिहिलं आहे की, “नमस्कार मी सूरज पवार, गेले दहा पंधरा दिवसात माझी एवढी मानहानी झाली किंवा केली असं म्हटलं तरी वावगं ठरणार नाही. सगळ्याच मीडियाने माझे एवढे धिंडवडे काढले. तरी पण मी शांत होतो. अखेर मी स्वत: राहुरी पोलीस स्टेशनला हजर झालो. पोलिसांसमोर सर्व कागदपत्रांसह माझे म्हणणे नमुद केले. त्यानंतर वेळोवेळी राहुरी पोलीस सांगतील त्या दिवशी हजर राहात होतो. पोलीस स्टेशनला पहिल्यांदा हजर राहिलो आणि बाहेर मिडीयात ‘प्रिन्सला पोलीसांनी केली अटक! प्रिन्स खाणार जेलची हवा! प्रिन्स अखेर जेरबंद!’ या अशा मधळ्याच्या बातम्या देऊन प्रिंट आणि डिजिटल मिडीयाने कुठलीही शहानिशा न करता माझ्या नावाने महाराष्ट्रभर रान पेटवलं.”
“खरे पाहाता राहुरी पोलीस स्टेशनला दाखल केलेल्या फिर्यादीत आणि त्यानंतर दाखल झालेल्या असंख्य तक्रारीत तक्रारदारांनी मला फक्त चित्रपटात काम करताना पाहिलं होतं. परंतू प्रत्येक्षात ते मला कधीच भेटले नव्हते. राहुरी पोलीस स्टेशनच्या अधिकाऱ्यांनी अखेर सर्व तक्रारदारांना पोलीस स्टेशनला बोलवून त्याची खात्री करून घेतली. तर एकाही तक्रारदारची माझ्याबाबत तक्रार नव्हती. आरोपींनी बचावाचा हेतू ठेवून माझे नाव घेतले होते. हे पोलिसांसमोर सिद्ध झालं. पोलीस अधिकारी श्री. दराडेसाहेब आणि श्री. सज्जनकुमार नऱ्हेडा आणि पोलीस टीमने सर्व सत्यता पडताळली आणि अखेर माझ्यावर लागलेलं ‘किटाळ’ एकदाचं संपलं”, असंही सुरज म्हणाला.
“यामध्ये झालेली मानहानी हे नुकसान कधी भरून येणारं आहे. माझ्या जवळच्या लोकांचा माझ्यावरील विश्वास या प्रकरणातून उडाला. असंख्य जवळची माणसे आणि नाती माझ्यापासून दुर गेली,” असं देखील त्यानं म्हटलं आहे.
