लष्करी रुग्णालयाचा निष्काळजीपणामुळे हवाई दलातील अधिकाऱ्याला HIV ची बाधा; सर्वोच्च न्यायालयाने ठोठावला 1.54 कोटींचा दंड
Army Hospital Medical Negligence : लष्कराच्या रुग्णालयात (Army Hospital) वैद्यकीय निष्काळजीपणामुळे एचआयव्ही पॉझिटिव्ह (HIV Aids) झालेल्या वायुसेनेच्या एका माजी अधिकाऱ्याला सर्वोच्च न्यायालयाकडून मोठा दिलासा मिळाला आहे. लष्कराच्या रुग्णालयाच्या निष्काळजीपणामुळे हवाई दलाचे माजी अधिकारी 2002 मध्ये एचआयव्ही पॉझिटिव्ह झाले होते. सर्वोच्च न्यायालयाने लष्कर आणि हवाई दलाला नुकसान भरपाई (Supreme Court Fine) देण्याचे आदेश दिले आहेत. सर्वोच्च न्यायालयात मंगळवारी, 26 सप्टेंबर रोजी या प्रकरणी सुनावणी पार पडली. भारतीय हवाई दलाला माजी हवाई दल अधिकाऱ्याला 1.54 कोटी रुपये भरपाई देण्याचे निर्देश भारतीय लष्कर आणि हवाई दलाला देण्यात आले आहेत.
नेमकं प्रकरण काय ?
याचिकाकर्ते माजी हवाई दल अधिकाऱ्यावर 2002 साली लष्करी रुग्णालयात उपचार करण्यात आले होते. हे अधिकारी 13 डिसेंबर 2001 मध्ये संसदेवर झालेल्या दहशतवादी हल्ल्याच्या पार्श्वभूमीवर सुरु केलेल्या ‘ऑपरेशन पराक्रम’ चा एक भाग होते. माजी हवाई दल अधिकारी ‘ऑपरेशन पराक्रम’ दरम्यान ड्युटीवर असताना आजारी पडले होते. त्यांना जुलै 2002 मध्ये लष्करी रुग्णालयात भरती करण्यात आले होते. जिथे त्यांच्यावर उपचार करण्यात आले आणि यावेळी त्यांना रक्त चढवण्यात आलं होतं. त्यानंतर 2014 मध्ये त्यांना एचआयव्हीची लागण झाल्याचं समोर आले आहे.
