“रूपाली चाकणकर यांना पदावर राहण्याचा अधिकार नाही”, उर्फी प्रकरणावरून चित्रा वाघ संतापल्या

मुंबई | Chitra Wagh – गेल्या काही दिवसांपासून भाजप (BJP) नेत्या चित्रा वाघ (Chitra Wagh) आणि अभिनेत्री, मॉडेल उर्फी जावेद (Urfi Javed) यांच्यात चांगलाच वाद सुरू आहे. चित्रा वाघ सातत्यानं उर्फीच्या कपड्यांवरून टीका करत आहेत. तसंच आता उर्फी प्रकरणावरून चित्रा वाघ यांनी महिला आयोगाला लक्ष्य करत रूपाली चाकणकर (Rupali Chakankar) यांच्यावर निशाणा साधला आहे.

यावेळी चित्रा वाघ म्हणाल्या की, “महिला आयोगानं उर्फी जावेद प्रकरणामध्ये सुमोटे केस चालवणं गरजेचं होतं. परंतु उर्फीला महिला आयोगानं सॉफ्ट कॉर्नर दिला आहे. मुंबईत महिला सार्वजनिक ठिकाणी उघडीनागडी फिरत असताना या प्रकरणाची महिला आयोगानं दखल घेतली नाही, हे दुर्दैवी आहे. समाजमाध्यमात अश्लील, घाणेरडे, ओंगळवाणे व्हिडीओ व्हायरल होत असताना देखील दुर्लक्ष केलं गेलं.”

“महिला आयोगानं ट्विटरवरच्या पोस्टची दखल घेत अनुराधा वेब सीरिजच्या पोस्टरवर आक्षेप घेतला होता. ते पोस्टर अभिनेत्री तेजस्वीनी पंडित यांचं होतं. त्यावेळी दिग्दर्शक संजय जाधव यांना नोटीस पाठवली होती. या पोस्टरमुळे समाजात धुम्रपान समर्थन आणि अंगप्रदर्शन असा चुकीचा संदेश जात असल्यानं जनमाणूस आणि समाजमाध्यमांवर प्रतिक्रिया उमटत असल्याचं आयोगानं नमूद केलं होतं”, असंही चित्रा वाघ यांनी सांगितलं.

पुढे त्या म्हणाल्या की, “इथे उर्फी जावेद रस्त्यावर उघडी-नागडी फिरत असूनही महिला आयोगाला काहीच कसं वाटत नाही? असा सवाल चित्रा वाघ यांनी उपस्थित केला. तसंच महिला आयोगाच्या अध्यक्ष रुपाली चाकणकर यांना पदावर राहण्याचा अधिकार नाही”, असंही चित्रा वाघ यांनी म्हटलं आहे.