इर्शाळवाडीवर दुहेरी संकट! बचावकार्य करताना अग्निशमन अधिकाऱ्याचा मृत्यू
रायगड | Irshalgad Landslide – काल (19 जुलै) रात्री खालापूरजवळील इर्शाळगडाच्या (Irshalgad) पायथ्याशी असलेल्या वसाहतीवर दरड कोसळल्याची दुर्देवी घटना घडली आहे. यामध्ये शंभरहून अधिक लोक अडकल्याची शक्यता वर्तवली जात आहे. बुधवारी मध्यारात्री दरड कोसळ्याचे बोलले जात आहे. या दुर्घेटनेत जवळपास पाच जणांचा मृत्यू झाल्याचे सांगण्यात येत आहे. या दुर्दैवी घटनेमुळे संपूर्ण राज्यात हळहळ व्यक्त होत आहे.
ही दुर्दैवी घटना घडल्यानंतर रात्री 2.30 वाजता बचावकार्य करण्यासाठी नवी मुंबई अग्निशमन दल घटनास्थळी दाखल झाले होते. यावेळी नवी मुंबई महानगर पालिकेचे बेलापूर येथील सहाय्यक केंद्र अधिकारी शिवराम ढुमणे यांचा दुर्दैवी मृत्यू झाला आहे. शिवराम ढुमणे हे आपलं कर्तव्य बजावत असताना त्यांचा दुर्दैवी मृत्यू झाला. त्यामुळे सगळीकडे हळहळ व्यक्त केली जात आहे.
बचावकार्य सुरू असताना अंधार आणि पावसामुळे अनेक अडथळे येत होते. त्यामुळे काही वेळासाठी बचावकार्य थांबवण्यात आलं होतं. मात्र, यादरम्यान अधिकारी शिवराम ढुमणे यांचा मृत्यू झाल्याची दुर्दैवी घटना घडली आहे.
दरम्यान, आता हे बचावकार्य पुन्हा एकदा सुरू करण्यात आले आहे. यावेळी 27 जणांना सुखरूपणे बाहेर काढण्यात आलं आहे. तर आता रेस्क्यू ऑपरेशनद्वारे अडकलेल्या इतर लोकांनाही बाहेर काढण्यात येत आहे.
