‘बाईचं माणूसपण…?’; अभिनेत्री मुक्ता बर्वेची पोस्ट चर्चेत
मुंबई : अभिनेत्री मुक्ता बर्वेनं मातृदिनाच्या निमित्ताने एक खास पोस्ट शेअर केली असून ती पोस्ट सध्या चर्चेत आहे. मुक्ता बर्वेनं ‘आईचं बाईपण व बाईचं माणूसपण’ या विषयीची पोस्ट सोशल मीडिया शेअर केली आहे. आपल्या सोशल मीडिया अकाउंट वरून नुकत्याच प्रसिद्ध केलेल्या व्हिडिओ मध्ये मुक्ता बर्वेनं म्हटलं आहे की, “बाईच्या आयुष्याच्या प्रत्येक वळणावर, कधी तिच्यावर बंधनं लादून, कधी भीती तर कधी स्वप्न दाखवून, धर्म – परंपरा – संस्कृती या सर्वांचं ओझं वाहण्याची जबाबदारी तिच्यावर सोपवून आणि हे तिला आणि इतरांना कळूच नये म्हणून की काय, पावलापावलावर तिच्या असण्याचंच गौरविकरण करून बाईचं माणूसपणच हिरावून घेण्याची एक सर्वमान्य व्यवस्था आपल्या आजूबाजूला गेली हजारो वर्षे अस्तित्वात आहे”.
मुक्ता बर्वेनं मातृदिनानिमित्त समाजातील प्रत्येक आईला बाई म्हणून आणि बाईला माणूस म्हणून समजून घेतलं पाहिजे असं आवाहन तिनं तिच्या आगामी चित्रपट ‘वाय’ च्या निमित्तानं सोशल मीडियावर केलं आहे. मुक्तानं व्हिडीओला दिलेल्या कॅप्शनमध्ये लिहिलं आहे की, ‘आईचं ‘आईपण’ साजरा करण्याचा दिवस…आईचं ‘बाईपण’ समजून घेण्याचा दिवस…बाईचं ‘माणूसपण’…?’ तसंच मुक्ताची ही पोस्ट सोशल मीडियावर चांगलीच व्हायरल होत आहे.
