“राज ठाकरे कोणाला जवळ करत नाहीत पण…”; सुपरस्टार भरत जाधवची पोस्ट चर्चेत!
मुंबई | Bharat Jadhav Post Under Discussion – मराठी अभिनेता भरत जाधव हे प्रसिद्ध अभिनेत्यांपैकी एक आहेत. भरत जाधव यांनी अनेक चित्रपट, नाटक आणि मालिकांमधून आपल्या उत्तम अभिनयानं आणि हसऱ्या चेहऱ्यानं प्रेक्षकांचं मनोरंजन केलं आहे. तसंच भरत जाधव सोशल मीडियावर चांगलेच सक्रिय असतात. नुकतंच भरत यांनी मनसे अध्यक्ष राज ठाकरे यांच्यासाठी एक खास पोस्ट शेअर केली आहे. राज ठाकरेंच्या वाढदिवसानिमित्त भरत जाधव यांनी ही खास पोस्ट शेअर केली आहे.
भरत जाधव यांनी त्यांच्या इन्स्टाग्राम अकाऊंटवर राज ठाकरेंच्या भाषणाचा एक व्हिडीओ शेअर केला आहे. या व्हिडीओमध्ये राज ठाकरे हे एका व्यासपीठावरुन भरत जाधव यांच्याबद्दल सांगताना दिसत आहे. यात राज ठाकरे हे भरत जाधवच्या आठवणींना उजाळा देत असल्याचं पाहायला मिळत आहे. राज ठाकरेंच्या वाढदिवसानिमित्त भरत जाधव यांनी जुना व्हिडीओ पुन्हा शेअर केला आहे. त्याला त्यांनी फार हटके कॅप्शन दिलं आहे.
भरत जाधव यांनी शेअर केलेल्या व्हिडीओच्या कॅप्शनमध्ये म्हटलं आहे की, “मा. राजसाहेब ठाकरे..!! खुप वर्षांपासूनची ओळख. मुळात ते राजकारणात जरी सक्रिय असले तरी जेंव्हा कधी आम्ही भेटतो तेंव्हा ते राजकारण या विषयावर अजिबात बोलत नाहीत. मराठी नाटक… मराठी सिनेमा मध्ये सध्या काय चाललंय. जागतिक सिनेमामध्ये सध्या काय चाललंय यावरच सगळ्या गप्पा असतात. सगळ्याच कलाकृतींवर त्यांचं चांगलं निरीक्षण असतं. आपण कुठल्या नवनवीन गोष्टी करायला हव्यात हेही ते सुचवतात. मध्यंतरी कोरोना काळात केदार त्यांना भेटायला गेला तेंव्हा लॉकडाऊन आणि त्या सर्व गोंधळात नाट्यगृह आणि चित्रपटगृह काही लवकर उघडण्याची चिन्ह दिसत नाहीत म्हणून पुन्हा टेलिव्हिजन करा हे सुचवणारे ही तेच. त्यातुनच पुढे ‘सुखी माणसाचा सदरा’ ची निर्मिती झाली ज्याद्वारे मी टिव्हीवर पुनरागमन केलं. मुळात त्यांचा स्वभाव असा आहे की ते चटकन कुणाला जवळ करत नाहीत आणि एकदा केलं तर त्याच्यासाठी हवं ते सर्व करण्यासाठी सिद्ध होतात. वेळोवेळी कुठे चुकत असाल तर कानउघाडणी ही करतात आणि चांगलं काम केलं तर मनापासून कौतुकही करतात. अशा या बहुआयामी व्यक्तिमत्वास व दिलदार नेत्यास वाढदिवसाच्या मनःपूर्वक शुभेच्छा..!!
दरम्यान, सध्या भरत जाधव यांची ही पोस्ट चांगलीच चर्चेत आहे. त्यांच्या या पोस्टवर अनेक लाइक्स आणि कमेंट पाहायला मिळत आहे. भरत जाधवच्या या पोस्टवर अनेकांनी कमेंट करत राज ठाकरेंना शुभेच्छा दिल्या आहेत.
