एका प्रेमाची अनोखी कहाणी! ट्रान्सजेंडर जोडप्याचं धुमधडाक्यात लग्न

पुणे | Pune Transgender Marriage – आत्तापर्यंत आपण वेगवेगळ्या पद्धतीचा विवाह पाहिला असेल. मात्र पिंपरी चिंचवडमध्ये समाजात जागृकता निर्माण करणारा एक विवाह सोहळा पार पडला आहे. पिंपरी चिंचवड महापालिकेत नियुक्त झालेल्या एका ट्रान्सजेंडर जोडप्यानं धुमधडाक्यात विवाह केला आहे. सुरक्षा रक्षक रूपा टांकसाळ आणि ग्रीन मार्शल प्रेम संतोष लोटलीकर असं या तृतीयपंथी जोडप्याचं नाव आहे. रुपा बुलढाण्याची तर प्रेम रत्नागिरीचे आहेत. 

आमचं एकमेकांवर प्रेम आहे हे कळल्यावर आधार वाटला. समाजात आम्हाला वेगळ्या नजरेनं बघतात मात्र एक नजर मला आयुष्यभरासाठी स्वीकारताना दिसली. शिवाय मी आहे तसं स्वीकारताना दिसली. प्रेम वगरे असतं मात्र आम्ही दोघे एकमेकांचा फार आदर करतो. त्यामुळे आम्ही एकत्र राहण्याचा आणि विवाह करण्याचा निर्णय घेतला, असं तृतीयपंथी सुरक्षा रक्षक रूपा टांकसाळ यांनी सांगितलं.

पीसीएमसीचे अधिकारी आणि काही सहकाऱ्यांच्या उपस्थितीत हा विवाह सोहळा पार पडला. एलजीबीटीक्यू समुदायाला महापालिकेच्या सेवेत सामावून घेण्याचा निर्णय आयुक्त तथा प्रशासक राजेश पाटील यांनी नुकताच घेतला आहे. तसंच LGBTQ कामगारांना नियुक्त करणारी PCMC ही देशातील पहिली नगरपालिका आहे. त्यामुळे या समुदयाबाबत समजात आदर वाढला आहे.