राहुल गांधींवर पोलिसांची कारवाई, काँग्रेसचं तीव्र आंदोलन

नवी दिल्ली | Rahul Gandhi Detained – सध्या काँग्रेसच्या अध्यक्षा सोनिया गांधी यांची ईडीकडून चौकशी सुरू आहे. याविरोधात काँग्रेस पक्षाकडून देशभरात आंदोलन केलं जात आहे. याच दरम्यान, राजधानी दिल्लीमधील आंदोलनात सहभागी झालेले राहुल गांधी यांच्यावर पोलिसांनी कारवाई केली असून त्यांना ताब्यात घेतलं आहे. याआधी 21 जुलैला ईडीने सोनिया गांधींची दोन तास चौकशी केली होती. ‘नॅशनल हेराल्ड’ प्रकरणात गेल्या महिन्यात राहुल गांधी यांच्यापाठोपाठ सोनिया गांधी यांना ‘ईडी’ने चौकशीसाठी बोलावलं होतं. मात्र, सोनिया गांधी यांना करोनाची लागण झाल्याने त्यांची चौकशी लांबणीवर गेली होती.

राहुल गांधी राजपथ मार्गावर रस्त्यावर बसून आंदोलन करत असताना पोलिसांनी त्यांना घेरलं होतं. तपास यंत्रणांकडून विरोधी पक्षातील नेत्यांना लक्ष्य केलं जात असल्याविरोधात तसंच महागाई, जीएसटी अशा अनेक मुद्द्यांवर राहुल गांधी आंदोलन करत होते. जवळपास अर्धा तास राहुल गांधी आंदोलन करत होते. यानंतर पोलिसांनी त्यांना उचलून ताब्यात घेतलेल्या इतर नेत्यांसोबत बसमधून नेलं आहे.

पोलिसांनी ताब्यात घेण्याआधी राहुल गांधी यांनी पंतप्रधान नरेंद्र मोदी राजे असून, देशात पोलिसांचं राज्य आहे अशी टीका केली. पोलिसांनी आंदोलनानंतर सर्व कार्यकर्त्यांवर कारवाई केली तेव्हा राहुल गांधी एकटेच होते. राहुल गांधींवर कारवाई करायची की नाही याबाबत पोलिसांमध्ये चर्चा सुरु होती.