“32 वर्षांचा तरुण नेता भारी पडतोय…” व्हिडीओ शेअर करत संजय राऊतांचा कुणाला टोला?
मुंबई | आदित्य ठाकरेंच्या (Aditya Thackeray) मतदारसंघात शिंदे गट आणि भाजपाची नेतेमंडळी शक्तीप्रदर्शन करणार असल्याचं बोललं जात होत. गेल्या काही दिवसांपासून या कार्यक्रमाची राजकीय वर्तुळात जोरदार चर्चा चालू होती. मंगळवारी मुख्यमंत्री एकनाथ शिंदे (Eknath Shinde) आणि उपमुख्यमंत्री देवेंद्र फडणवीस (Devendra Fadnavis) यांच्या उपस्थितीत वरळी येथे हा कार्यक्रम पार पडला. या दोघांचा कोळी समाजाच्या वतीने सत्कार करण्यात आला. यावेळी भाजपा आणि शिंदे गटाच्या नेतेमंडळींनी भाषणांमधून जोरदार टोलेबाजीही केली.
दरम्यान, कार्यक्रमाचे काही व्हिडीओ सध्या सोशल मीडियावर व्हायरल होत आहेत. असाच एक व्हिडीओ शेअर करत ठाकरे गटाचे खासदार आणि प्रवक्ते संजय राऊत (Sanjay Raut) यांनी एकनाथ शिंदेंना टोला लगावला आहे. यावेळी त्यांनी आदित्य ठाकरेंचाही उल्लेख केला आहे.
संजय राऊतांनी शेअर केलेल्या या व्हिडीओमध्ये सभेच्या ठिकाणी अनेक खुर्च्या रिकाम्या दिसत आहेत. यावरून सध्या सत्ताधारी आणि ठाकरे गट यांच्यात दावे-प्रतिदावे सुरू झाले आहेत. हा कार्यक्रम सभा नसून सत्काराचा होता, तिथे एवढी गर्दी अपेक्षित नव्हती, असा दावा शिंदे गटाकडून केला जात आहे.
संजय राऊतांनी हा व्हिडीओ त्यांच्या ट्विटर हँडलवर शेअर करत मुख्यमंत्र्यांना टोला लागावला आहे. “मुख्यमंत्र्यांचं भाषण सुरू असताना लोक घरी निघालेत. वरळी कोळी बांधवांनी धोक्याचा बावटा दाखवला..कशाला उगाच स्वतःची अब्रू काढून घेताय..३२ वर्षांचा तरुण नेता भारी पडतोय..बरोबर ना?” असा खोचक सवाल संजय राऊतांनी उपस्थित केला आहे.
