गुजरातमध्ये कोण मारणार बाजी? पाहा एक्झिट पोल

गांधीनगर | Gujarat Election 2022 – आज (5 डिसेंबर) गुजरातमध्ये दुसऱ्या टप्प्यातील विधानसभा निवडणुकीसाठी मतदान पार पडलं असून आता निवडणुकीची रणधुमाळी संपली आहे. त्यामुळे आता गुजरातमध्ये भाजप, काँग्रेस की आप बाजी मारणार हे येत्या 8 डिसेंबरला जाहीर होणार आहे. त्यामुळे सर्वांचं या निकालाकडे लक्ष लागलं आहे. यादरम्यान, अनेक जनमत कल जाहीर होत आहेत. त्या जनमत कौलाप्रमाणे भाजप, काँग्रेस आणि आपला किती जागा मिळण्याचा अंदाज आहे याचा आढावा खालीलप्रमाणे.

एक्झिट पोलनुसार कोणाला किती जागा?

‘टीव्ही 9’च्या एक्झिट पोलनुसार, गुजरातमध्ये भाजपला 128 ते 149 जागा मिळण्याचा अंदाज व्यक्त करण्यात आला आहे. तर काँग्रेस – 30 ते 42, आप- 2 ते 10 आणि अपक्षांना 0 ते 3 जागा मिळतील, असा एक्झिट पोल रिपोर्ट आलेला आहे. या एक्झिट पोलनुसार यावेळीही गुजरातमध्ये पुन्हा भाजप बहुमतामध्ये येण्याचा अंदाज व्यक्त होत आहे.

दरम्यान, गुजरातमध्ये विधानसभेच्या एकूण 182 जागा आहेत. यामध्ये पहिल्या टप्प्यात 1 डिसेंबरला 89 जागांसाठी मतदान झालं होतं. तर सोमवारी (5 डिसेंबर) दुसऱ्या टप्प्यात 93 जागांसाठी मतदान पार पडलं. यंदा गुजरातमध्ये भाजप, काँग्रेस आणि आप अशी लढत पाहायला मिळाली. त्यामुळे मतदार आता कोणाला कौल देतात हे पाहणं उत्सुकतेचं ठरणार आहे.