मुंबई-गोवा मार्गावर कोलाडपुईचा पूल धोकादायक
रायगड : महाडच्या सावित्री पूल दुर्घटनेनंतर राज्यातील मुख्य महामार्ग व अंतर्गत मार्गावरील पुलांच्या सुरक्षेचा प्रश्न ऐरणीवर आला. मात्र ठिकठिकाणी आजही काही जुन्या पुलांवर धोक्याची घंटा वाजतेय. असाच एक जुना व खालून-वरून पोखरलेला नदी पूल मुंबई-गोवा राष्ट्रीय महामार्ग ६६ वर असल्याचे दिसून येतो. कोलाडपुई गावानजीक असलेला महिसदरा नदीवरील ब्रिटिशकालीन पूल वाहतूक व प्रवासाच्या दृष्टीने अत्यंत जीवघेणा व धोकादायक बनलाय. हा पूल कोसळला, तर मुंबई गोवा महामार्ग वाहतूक पूर्णपणे ठप्प होणार आहे. मुंबई-गोवा महामार्गाच्या पनवेल ते इंदापूर या ८४ किमीच्या पहिल्या टप्प्याचे काम तब्बल १३ वर्षांपासून रेंगाळले आहे. अशातच या मार्गावरील पुलांची कामेदेखील रखडली आहेत. महामार्गावरील कामे नॅशनल हायवे अॅथॉरिटी ऑफ इंडिया पनवेल यांच्या माध्यमातून होत आहेत.
महाड सावित्री पूल दुर्घटनेनंतर राज्यातील मुख्य महामार्ग व अंतर्गत मार्गावरील पुलांच्या सुरक्षेचा प्रश्न ऐरणीवर आला.
राज्यातील सर्व पुलांचे स्ट्रक्चर ऑडिट करण्यात आले. नवे पूल उभारणीसह पुलांचे मजबुतीकरण करण्यासंदर्भात पावले उचलली गेली. पण पुई गावालगतच्या या पुलावरून दिवसरात्र प्रवासी वाहतुकीसह अत्यंत अवजड, ओव्हरलोड वाहतूक होतेय. अरुंद पूल असल्याने वाहतुकीला देखील वारंवार अडथळा येतो. या पुलावर अपघाती घटनादेखील घडतात. या पुलावरून वाहने जाताना जबर हादरे बसतात. पुलावर मोठमोठे खड्डे पडलेले आहेत तर पुलाची खालील बाजू खचलेली, पुलाला ठिकठिकाणी तडे गेलेत, सळया बाहेर निघालेल्या अवस्थेत आहेत. मुख्य खांब काही घटकेचे सारथी असल्याचे चित्र पहावयास मिळतेय. साधारणतः दहा वर्षांपूर्वी याच पुलाच्या बाजूला नवीन पुलाचे काम सुरू करण्यात आले होते.
मात्र ते अद्याप रखडलेलेच आहे. या पुलाची धोकादायक स्थिती असताना आजघडीला केवळ मलमपट्टीचे काम केले जातेय. या पुलावरून प्रवास करताना जीव मुठीत धरून प्रवास करावा लागतोय. सदर जुना व जर्जर झालेला पूल केव्हाही कोसळून मोठी दुर्घटना घडू शकते, अशी भीती स्थानिक रहिवासी व प्रवासी वाहनचालक व्यक्त करीत आहेत. संबंधित प्रशासन व सरकारने कोणतीही दुर्घटना घडण्यापूर्वी उपाययोजना करावी, नवीन पुलाचे मजबूत व दर्जेदार बांधकाम करून प्रवासी व वाहनचालक यांचा प्रवास सुखकर व सुरक्षित करण्यासाठी पुढाकार घ्यावा, अशी मागणी होत आहे.
