संत सोपानकाका पालखीचे रणसिंग महाविद्यालयाने केले स्वागत
स्वयंसेवकांनी वारकऱ्यांची केली सेवा!
इंदापूर : इंदापूर तालुका ग्रामविकास प्रतिष्ठान संचलित विश्वासराव रणसिंग महाविद्यालय कळंब, ता. इंदापूर महाविद्यालयाचे राष्ट्रीय सेवा योजना व विद्यार्थी कल्याण मंडळ यांच्या संयुक्त विद्यमाने आषाढी पायी वारीसाठी निघालेल्या श्री संत सोपानकाका महाराज पालखी सोहळा सासवड व श्री संतराज महाराज पालखी सोहळा श्रीक्षेत्र संगम रांजणगाव वाळकी बेट पालखी सोहळ्यातील वारकर्यांना महाविद्यालयाच्या वतीने २००० बिस्किट पुडे व लोणचे पाकिटे वाटप करण्यात आली.
श्री संतराज महाराज पालखी सोहळाप्रमुख हभप सुरेश महाराज साठे यांचे स्वागत महाविद्यालयाचे प्राचार्य डॉ. अंकुश आहेर यांनी केले. कोरोना काळात आषाढीवारी घडली नाही. त्यामुळे यावर्षी वारकर्यांना विठुरायाच्या दर्शनासाठी आस लागली असल्याने हरिनामाच्या भक्तीमध्ये तीन होऊन वारकरी ऊन, वारा, पाऊस यांची तमा न बाळगता विठुरायाच्या दर्शनासाठी निघाला आहे. वारीमध्ये ज्ञानोबा तुकाराम नामघोषात वाटचाल करीत प्रत्येकामध्ये ईश्वराचे रूप पाहात वारी केल्यामुळे वारकर्यांना एकमेकांमध्ये माऊलीचे दर्शन घडत असल्याचे सांगितले. वारकर्यांची सेवा करीत प्राध्यापक व विद्यार्थी यांनी बिस्किट पुडे वाटप करून वारी सेवेचा आनंद घेतल्याचे प्राचार्य डॉ. अंकुश आहेर यांनी सांगितले. यावेळी उपप्राचार्य डॉ. अरुण कांबळे, प्रा. डॉ. रामचंद्र पाखरे, प्रा. ज्योत्स्ना गायकवाड, प्रा.राजेंद्रकुमार डांगे, प्रा. डॉ. सुहास भैरट, प्रा. ज्ञानेश्वर गुळीग, ग्रंथपाल विनायक शिंदे आदी उपस्थित होते.
