शिवसेना प्रवक्त्यांनी नवनीत राणांची काढली कुंडली बाहेर…
अमरावती : (Sanjana Ghadi On Navneet Rana) हनुमान चालिसा पाठनापासून नवनीत राणा आणि शिवसेनेमध्ये सुरू असलेला वाद काही केल्या थांबताना दिसत नाही, शिवसेनेने नवनीत राणांवर जोरदार हल्लाबोल केला आहे. एक आमदार आपल्यावर भाळला आणि राजकारणात आपला चंचू प्रवेश झाला. अशा शब्दांत शिवसेना प्रवक्त्या संजना घाडी यांनी नवनीत राणांवर हल्लाबोल करत राणांच्या टीकेला प्रत्युत्तर दिले आहे.
दरम्यान यावेळी घाडी म्हणाल्या, नवनीत राणा जरा तोंड सांभाळून बोला. कोण आहात आपण ‘सी’ ग्रेड फिल्ममध्ये काम करणाऱ्या एक अभिनेत्या असल्याची आठवणही घाडी यांनी करून दिली आहे. कितीही शूर्पणखा अंगावर आल्या तरी त्यांचं नाक कापू, अशा सणसणीत शब्दात त्यांनी नवनीत राणांवर आगपाखड केली आहे.
कावळीणीच्या शापाने गाय मरत नसते बाई..! त्यामुळे माझ्या शापामुळे माझ्यावर झालेल्या अन्यायामुळे शिवसेनेला कार्यकर्ता उरला नाही, अशा फाजील वल्गना करून अशी थेरं महाराष्ट्राला दाखवू नका असा सल्लाही घाडी यांनी दिला आहे. तसेच शिवसेना ही कालही मजबूत होती आजही मजबूत असून, तुमच्यासारख्या 100 दुश्मनांच्या छाताडावर उभी राहून पुन्हा एकदा या मुंबई, महाराष्ट्रावर आपला भगवा डौलाने फडकत ठेवणार असल्याचा विश्वास घाडी यांनी व्यक्त केला आहे.
