मोदी सरकारची मोठी घोषणा ! रिझर्व्ह बॅंकेच्या गव्हर्नरपदी संजय म्हलोत्रा यांची नियुक्ती
सरकारने महसूल सचिव संजय मल्होत्रा यांची भारतीय रिझर्व्ह बँकेचे (RBI) नवे गव्हर्नर म्हणून नियुक्ती केली आहे. ते RBI चे २६ वे गव्हर्नर असतील आणि सध्याचे गव्हर्नर शक्तीकांत दास यांची जागा घेतील. दास यांचा कार्यकाळ १० डिसेंबर २०२४ रोजी संपत आहे. मल्होत्रा ११ डिसेंबरपासून गव्हर्नरपदाचा कार्यभार स्वीकारणार आहेत.
मंत्रिमंडळाने ९ डिसेंबर रोजी संजय मल्होत्रा यांच्या नियुक्तीला मान्यता दिली आहे. १२ डिसेंबर २०१८ रोजी शक्तिकांत दास यांना गव्हर्नर बनवण्यात आले. त्यानंतर त्यांचा कार्यकाळ आणखी तीन वर्षांसाठी वाढवण्यात आला. त्यांनी उर्जित पटेल यांची जागा घेतली होती.
मध्यवर्ती बँक कठीण परिस्थितीत असताना नवीन गव्हर्नर पदभार स्वीकारत आहेत. जुलै-सप्टेंबर या कालावधीत विकास दर ५,४% च्या सात-तिमाहीतील नीचांकी पातळीवर गेल्याने RBI वर व्याजदरात कपात करण्याचा दबाव वाढत आहे. दास यांच्या नेतृत्वाखाली, RBI ने महागाईच्या जोखमीचा हवाला देत जवळजवळ दोन वर्षे व्याजदर अपरिवर्तित ठेवले आहेत.
संजय मल्होत्रा यांचे शिक्षण
संजय मल्होत्रा, १९९० च्या बॅचचे भारतीय प्रशासकीय सेवा (IAS) राजस्थान केडरचे अधिकारी आहेत, त्यांनी इंडियन इन्स्टिट्यूट ऑफ टेक्नॉलॉजी (IIT) कानपूर मधून कॉम्प्युटर सायन्समध्ये अभियांत्रिकी पदवी आणि यूएसएच्या प्रिन्सटन विद्यापीठातून सार्वजनिक धोरणात पदव्युत्तर पदवी प्राप्त केली आहे.
संजय मल्होत्रा याचे कार्य
मल्होत्रा यांनी ऊर्जा, वित्त आणि कर, माहिती तंत्रज्ञान आणि खाणी यासह विविध क्षेत्रात काम केले आहे. त्यांना ३३ वर्षांपेक्षा जास्त अनुभव आहे. वित्त मंत्रालयात सचिव (महसूल) म्हणून काम करण्यापूर्वी, त्यांनी भारत सरकारच्या वित्त मंत्रालयाच्या अंतर्गत वित्तीय सेवा विभागात सचिव पदावर काम केले. मल्होत्रा यांच्याकडे राज्य आणि केंद्र सरकार या दोन्ही स्तरांवर वित्त आणि करप्रणालीत कौशल्य आहे.
