शिंद गटाचे प्रतोद भरत गोगावलेंच्या गाडीचा अपघात

मुंबई | Bharat Gogawale’s Car Accident – शिवसेना शिंदे गटाचे विधिमंडळाचे प्रतोद भरत गोगावले यांच्या गाडीचा मुंबईत अपघात झाला आहे. काही वेळापूर्वी मुंबईतील फ्री वेवर हा अपघात झाल्याची माहिती आहे. भरत गोगावले यांच्या कारचा मुंबईतल्या फ्री वे ब्रीजवर वाडीबंदर जवळ अपघात झाला आहे. फ्री वेवर आठ गाड्यांची एकमेकांना धडक बसली. या अपघातात सुदैवाने कुणालाही दुखापत झालेली नाही. माहितीनुसार भरत गोगावले हे सकाळी मंत्रालयात निघाले असताना गाडीचा अपघात झाला. पुढे जाणाऱ्या वाहनाने अचानक ब्रेक मारल्याने वाहनांचा अपघात झाला असल्याची प्राथमिक माहिती आहे. 

अपघातानंतर भरत गोगावले म्हणाले, आठ गाड्या एकमेकांवर आदळल्या. मात्र कुणालाही काहीही दुखापत झालेली नाही. कुणीही काळजी करु नका, आम्ही सगळे सुखरुप आहोत, असं गोगावले यांनी म्हटलं आहे. 

दरम्यान, आदित्य ठाकरे यांनी शिवसैनिकांच्या मेळाव्यांमध्ये शिवसेनेचे बंडखोर आमदारांवर निशाणा साधला होता. त्यांच्या या वक्तव्याला शिवसेनेच्या बंडखोर शिंदे गटाचे प्रतोद भरत गोगावले यांनी उत्तर दिलं आहे. कुणी कितीही लाज लज्जा काढू देत, आम्ही काही चुकीचं केलं नाही, त्यामुळे सुप्रीम कोर्टात आमचा विजय निश्चित आहे, असं भरत गोगावले यांनी म्हटलं आहे.