मेट्रो लाइन-३ तर्फे विशेष ‘फायर सेफ्टी ड्रील’
पुणे ः हिंजवडी ते शिवाजीनगर या सुमारे २३ किमी अंतराच्या मार्गावर सुरू असलेल्या पुणे मेट्रो लाइन-३ च्या कामकाजाचा सुरक्षा आढावा आज घेण्यात आला. यावेळी पिंपरी चिंचवड अग्निशमन दलाच्या सहयोगाने एका विशेष ‘फायर सेफ्टी ड्रील’चे आयोजन करण्यात आले होते. हिंजवडी ते शिवाजीनगर मार्गावरील पुणे मेट्रो लाइन-३ चे काम ’पीएमआरडीए’ तर्फे सार्वजनिक खासगी भागीदारी (पीपीपी) तत्त्वावर टाटा समूहाने हाती घेतले असून, त्याच्या कार्यान्वयनासाठी पुणे आयटी सिटी मेट्रो रेल लिमिटेड या स्पेशल पर्पज व्हेइकल (एसपीव्ही) कंपनीची स्थापना करण्यात आलेली आहे.
हिंजवडी आयटी हब आणि शिवाजीनगर मध्यवर्ती केंद्र यांना जोडणारी ही मेट्रो लाइन अतिशय महत्त्वाची असल्याने या मार्गिकेवरील सुरक्षाविषयक तरतुदी आणि आपत्कालीन नियोजन यांचा आढावा घेण्यासाठी ताथवडे कास्टिंग यार्ड येथे या ‘फायर सेफ्टी ड्रील’चे आयोजन करण्यात आले होते. मेट्रो उभारणीचे काम सुरू असताना कोणकोणत्या संभाव्य कारणांमुळे आग लागण्याचा धोका असू शकतो, आगीच्या कारणानुसार ती विझवण्याचे विभिन्न मार्ग कोणते; आणीबाणीच्या प्रसंगी अग्निशमन दलाची प्रत्यक्ष मदत पोहचेपर्यंत कंपनीचे कर्मचारी कशा प्रकारची खबरदारी उपाययोजना करू शकतात इत्यादी विविध महत्त्वपूर्ण बाबींचे प्रशिक्षण यावेळी देण्यात आले.
पुणे आयटी सिटी मेट्रो कंपनीचे वाहतूक नियमन अधिकारी, सुरक्षा अधिकारी, समन्वय अधिकारी यांच्या जोडीने पिंपरी चिंचवड अग्निशमन दलाचे अधिकारी व कर्मचारी आणि वाहतूक पोलिस खात्याचे अधिकारी व कर्मचारी यावेळी उपस्थित होते. पीएमआरडीए प्रणीत हिंजवडी ते शिवाजीनगर मार्गावरील मेट्रोच्या उभारणीमुळे सुलभ, वेगवान आणि स्वस्त सार्वजनिक वाहतुकीचा पर्याय उपलब्ध होणार आहे. नागरिकांच्या सुविधेसाठी हाती घेण्यात आलेल्या या प्रकल्पाच्या सर्वच टप्प्यांत गुणवत्ता आणि सुरक्षितता याबाबत कुठलीही तडजोड न करण्याचे टाटा समूहाचे धोरण आहे.
