आंतरराष्ट्रीय चित्रपट महोत्सवासाठी प्रदर्शनापूर्वीच ‘उनाड’ची निवड
आदित्य सरपोतदार दिग्दर्शित ‘उनाड’ चित्रपटाची सध्या जोरदार चर्चा सुरू आहे. प्रदर्शनापूर्वीच या चित्रपटाची निवड आंतरराष्ट्रीय चित्रपट महोत्सवासाठी झाली आहे.
मराठी चित्रपटसृष्टीचे आता अच्छे दिन आले आहेत, असे म्हणायला हरकत नाही. असे म्हणण्यामागचे कारण म्हणजे आता मराठीमध्येही उत्तमोत्तम कलाकृती तयार होत आहेत. उत्तम कथेवर आधारित मराठी चित्रपट प्रेक्षकांच्या पसंतीस पडत आहेत. इतकेच नव्हे, तर ऐतिहासिक चित्रपटही प्रेक्षकांना भुरळ घालत आहेत. मराठी चित्रपटांना मिळत असलेले यश खरेच कौतुकास्पद आहे. आता असाच एक उत्तम कथा असणारा मराठी चित्रपट प्रेक्षकांच्या भेटीला येणार आहे आणि प्रदर्शनापूर्वीच या चित्रपटाची निवड आंतरराष्ट्रीय चित्रपट महोत्सवासाठी झाली आहे.
आदित्य सरपोतदार दिग्दर्शित या चित्रपटाचे नाव आहे ‘उनाड.’ प्रदर्शनापूर्वीच या चित्रपटाने बाजी मारली आहे. चेक रिपब्लिक येथे होणार्‍या झ्लिन आंतरराष्ट्रीय चित्रपट महोत्सवामध्ये युवा विभागाच्या फिचर फिल्म्सच्या आंतरराष्ट्रीय स्पर्धेसाठी ‘उनाड’ची निवड झाली आहे. ही खरेच मराठी चित्रपटासाठी आनंदाची बातमी आहे, असे म्हणता येईल.
चित्रपटाचे दिग्दर्शक आदित्य सरपोतदार यांनी त्यांच्या सोशल मीडिया अकाऊंटद्वारे याबाबतची माहिती दिली. ही आपल्या सगळ्यांसाठीच आनंदाची बातमी आहे. असे म्हणत त्यांनी ही पोस्ट शेअर केली आहे. त्यांच्या या पोस्टवर अनेक मराठी कलाकारांनी कमेंट्स केल्या आहेत. तसेच चित्रपटाला शुभेच्छाही दिल्या आहेत. ‘उनाड’ ही कथा हर्णे किनारपट्टीवर मासेमारी करणार्‍या तीन तरुणांची आहे. शुभ्या, बंड्या आणि जमील हे तीन मित्र गावात फक्त फिरत असतात. आयुष्यात पुढे काय केले पाहिजे, त्याचा विचारदेखील ही मुले करीत नाहीत. अशा मुलांना गावातील लोकही उनाड म्हणून बोलू लागतात आणि मग त्यांच्या आयुष्यात पुढे काय घडते, हे या चित्रपटात दाखवण्यात आले आहे. जिओ स्टुडिओज प्रस्तुत या चित्रपटाची निर्मिती ज्योती देशपांडे, अजित अरोरा, चंद्रेश भानुशाली आणि प्रीतेश ठक्कर यांनी केली आहे. आशुतोष गायकवाड, हेमल इंगळे, अभिषेक भरते, चिन्मय जाधव, देविका दफ्तरदार आणि संदेश जाधव कलाकार या चित्रपटात मुख्य भूमिका साकारताना दिसणार आहेत.
