बदल्याचे राजकारण! आधी टोपेंच्या गाडीवर हल्ला, नंतर लोणीकरांच्या घरावर दगडफेक; एकमेकांच्या कार्यकर्त्यांवर आरोप
जालना : (Babanrao Lonikar On Rajesh Tope) शनिवारी (दि. 02 डिसेंबर) रोजी दुपारी 1 वाजताच्या सुमारास माजी मंत्री तथा शरद पवार गटाचे आमदार राजेश टोपे (Rajesh Tope) यांच्या गाडीवर अज्ञात लोकांकडून दगडफेक करण्यात आली. त्यानंतर बबनराव लोणीकर यांच्या कार्यकर्त्यांनी हा हल्ला केल्याचा आरोप टोपे यांनी केला होता. या घटनेला काही तास उलटत नाहीत तोच मंत्री बबनराव लोणीकर (Babanrao Lonikar) यांच्या घरावर अज्ञात लोकांनी दगडफेक केल्याची घटना समोर आली आहे.
यामुळे परिसरात तणावाचे वातावरण पाहायला मिळत आहे. जिल्हा बँकेच्या निवडणुकीवरून हा राडा झाला असल्याचे बोलले जात आहे. तर, राजेश टोपेंच्या कार्यकर्त्यांनी हा हल्ला केल्याचा आरोप लोणीकर यांच्याकडून करण्यात येत आहे. आज जालना जिल्हा मध्यवर्ती बँकेच्या चेअरमन आणि व्हाईस चेअरमन पदाची निवडणूक झाली असून, यावरून लोणीकर विरुद्ध टोपे असा वाद पाहायला मिळत आहे. यावरून आज दुपारी राजेश टोपे यांच्या गाडीवर दगडफेक करण्यात आली होती. अज्ञात तरुणांनी टोपे यांच्या गाडीवर दगडफेक करून घोषणाबाजी केली.
दरम्यान, या घटनेत टोपे यांच्या गाडीच्या काच्या फुटल्या असून, गाडीजवळ एक लाकडी दांडा आणि ऑइलची बॉटल देखील सापडलेली आहे. दरम्यान, यामागे लोणीकर असल्याचा आरोप टोपे यांनी केला होता. त्यानंतर आता लोणीकर यांच्या घरावर दगडफेक करण्यात आली आहे. त्यामुळे लोणीकर विरुद्ध टोपे असा वाद तापल्याचे पाहायला मिळत आहे.
टोपेंच्या भावाच्या घरावरही दगडफेक…
राजेश टोपे यांची गाडी फोडल्याच्या घटनेनंतर आक्रमक झालेल्या टोपे समर्थकांनी लोणीकरांच्या घरावर हल्ला केला केल्याचा आरोप होत आहे. याची माहिती मिळताच लोणीकरांच्या घराच्या बाजूला असलेल्या राजेश टोपे यांच्या भावाच्या घरावर लोणीकर समर्थकांनी दगडफेक केली. त्यामुळे घटनास्थळी तणावाचे वातावरण निर्माण झाले आहे. परिस्थिती नियंत्रणात आणण्यासाठी पोलिसांचा मोठा बंदोबस्त तैनात करण्यात आला आहे.
