पेरणीसाठी शेतकऱ्यांना प्रती एकर 10 हजार रुपये द्या, विभागीय आयुक्त केंद्रेकरांची सरकारकडे शिफारस
छत्रपती संभाजीनगर : (Marathwada Agriculture News) सततच्या अवकाळी सारख्या संकटामुळे मराठवाड्यातील (Marathwada) शेतकरी मेटाकुटीला आला आहे. डोक्यावर सावकाराचे कर्ज आणि बँकेंचा तगादा यामुळे शेतकरी आर्थिक परिस्थितीला कंटाळून आत्महत्या सारखे टोकाचे पाऊल उचलत असल्याचे समोर येत आहे. त्यामुळे आर्थिक संकटात सापडलेल्या शेतकऱ्यांना मदत करुन आत्महत्या रोखण्यासाठी मराठवाड्यातील शेतकऱ्यांना पेरणीसाठी प्रती एकर 10 हजार रुपये द्या, अशी शिफारस विभागीय आयुक्त सुनील केंद्रेकर (Sunil Kendrekar) यांनी सरकारकडे केली आहे.
केंद्रेकर यांच्या मार्गदर्शनाखाली मराठवाड्यातील शेतकऱ्यांचा एक सर्वे करण्यात आला. ज्यामध्ये पाच लाख कुटुंबाचे 12 टप्प्यात आणि 100 प्रश्न तयार करुन हा सर्व्हे करण्यात आला आहे. तर शेतकरी आत्महत्या रोखण्यासाठी शेतकऱ्यांना खरीप आणि रब्बी हंगामाच्या पेरणीसाठी प्रती एकर 10 हजार रुपये रोख रक्कम देण्याचा निकष या सर्व्हेमधून काढण्यात आला आहे. तर याबाबतचा अहवाल सरकारला देणार असल्याची माहिती सुनील केंद्रेकर यांनी दिली आहे.
याबाबत बोलताना केंद्रेकर म्हणाले की, सध्या शेतकऱ्यांची परिस्थिती खूप वाईट आहे. त्यामुळे त्यांना दिलासा देण्यासाठी आणि शेतकरी आत्महत्या रोखण्यासाठी आम्ही एक सर्व्हे केला. ज्यात आमच्या जिल्हाधिकारी यांनी देखील स्वतः शेतकऱ्यांच्या घरी जाऊन माहिती जमा केली. संपूर्ण सर्व्हेचा डेटा ऑनलाईन केला. ज्यात जे शेतकरी आत्महत्या करण्याच्या विचारत असल्यास त्याचा रेड अलर्ट दिसतो. त्यामुळे अशा शेतकऱ्यांना कार्यालयात बोलावून त्यांच्यासोबत संवाद साधून त्यांची अडचणी समजून घेतल्या जात आहे.
तसेच त्यांचे समुपदेशन करण्यात येत आहे. पण शेतकरी आत्महत्या करण्याचं महत्वाचा कारण आर्थिक परिस्थितीच आहे. त्यामुळे पेरणीच्या वेळी शेतकऱ्यांना 10 हजार रुपये प्रती एकर दिल्यास आत्महत्या रोखण्यात यश येऊ शकते असे केंद्रेकर म्हणाले. विशेष म्हणजे अशाप्रकारे सरकारकडे शिफारस करणारे केंद्रेकर पहिले अधिकारी आहेत.
